Sevil Əliyeva Azərbaycana köçdüyünü açıqlayıb

Ümummilli Lider Heydər Əliyevin qızı, bəstəkar və "Şöhrət" ordenli Sevil Əliyeva sosial şəbəkədə etdiyi paylaşımda 2017-ci ildən etibarən Azərbaycanda yaşadığını açıqlayıb.

Sevil Əliyeva ona ünvanlanan xoş sözlərə və göstərilən dəstəyə görə təşəkkür edərək bildirib ki, uzun illər xaricdə yaşadığı üçün bir çoxları onun hələ də ölkə xaricində olduğunu düşünür.

"2017-ci ildən etibarən Bakıda, ata evimdə yaşayıram və həyatımı doğma Vətənimdə davam etdirirəm", - o qeyd edib.

Sevil Əliyeva paylaşımında ona göstərilən diqqət və sevgini yüksək qiymətləndirdiyini vurğulayıb, hər kəsə cansağlığı, firavanlıq, xoşbəxtlik və uğurlar arzulayıb.

Sevil Əliyeva Azərbaycan bəstəkarı və ictimai xadimdir. O, Azərbaycanın Ümummilli Lideri Heydər Əliyevin qızı, Prezident İlham Əliyevin bacısıdır.