Azərbaycanın həyat sığortası bazarında ödənişlər ilk yarıda haqlardan daha sürətlə artıb

Azərbaycanın həyat sığortası bazarında 2026-cı ilin yanvar-iyun aylarında yığılan sığorta haqları illik müqayisədə 8,8% artaraq 516,448 milyon manata çatıb, ödənişlər isə daha sürətli – 32,6% artaraq 402,048 milyon manat olub.

Azərbaycan Mərkəzi Bankının məlumatına görə, hesabat dövründə həyat sığortası üzrə toplanan hər 100 manat sığorta haqqının 77,8 manatı müştərilərə ödənilib. Bu göstərici ötən ilin eyni dövründə 63,9 manat təşkil etmişdi.

Artan ödənişlər nəticəsində həyat sığortası bazarında ödəniş əmsalı əhəmiyyətli dərəcədə yüksəlib ki, bu da sığortaçıların üzərinə düşən öhdəliklərin artdığını göstərir.

Ümumilikdə isə Azərbaycanın 16 sığorta şirkəti bu ilin ilk altı ayında 867,396 milyon manat sığorta haqqı toplayıb ki, bu da ötən ilin eyni dövrü ilə müqayisədə 6,2% çoxdur.

Sığorta şirkətlərinin həyata keçirdiyi ödənişlər isə 27,2% artaraq 549,682 milyon manata çatıb.
Nəticədə, ümumi sığorta bazarında toplanan hər 100 manat sığorta haqqının 63,4 manatı ödənişlərə yönəlib. Bir il əvvəl bu göstərici 52,9 manat idi. Bu dinamika ödənişlərin bazarın böyümə tempini üstələdiyini göstərir.