Qəbələ Musiqi Festivalında ilk dəfə Azərbaycan və dünya kinofilmlərinin musiqiləri səsləndirilib

Heydər Əliyev Fondunun təşəbbüsü və təşkilatçılığı ilə keçirilən XV Qəbələ Beynəlxalq Musiqi Festivalı çərçivəsində ilk dəfə Azərbaycan və dünya kinofilmlərindən seçilmiş musiqilərdən ibarət xüsusi konsert proqramı təqdim olunub.

Heydər Əliyev Fondunun məlumatına görə, Mədəniyyət Nazirliyi, Üzeyir Hacıbəyli adına Bakı Musiqi Akademiyası və "Gilan"ın dəstəyi ilə reallaşan layihə Mustafa Mehmandarovun bədii rəhbərliyi və baş dirijorluğu ilə "Scorrendo" Orkestrinin müşayiəti altında baş tutub.

Konsertdə skripka ifaçısı Səid Məmmədov və soprano Natella Quliyeva solist qismində çıxış ediblər.

Proqramda Tofiq Quliyevin "Görüş", Arif Məlikovun "Axırıncı aşırım", Xəyyam Mirzəzadənin "Yeddi oğul istərəm", Fikrət Əmirovun "Böyük dayaq" filmləri üçün yazdığı musiqilərlə yanaşı, Con Uilyams, Hans Zimmer, Ennio Morrikone, Ramin Cavadı, Nino Rota və Bill Kontinin müəllifi olduqları "Ulduz müharibələri", "Harri Potter", "İnterstellar", "Qeyri-mümkün tapşırıq", "İndiana Cons", "Peşəkar", "Matrisa", "Karib dənizinin quldurları", "Xaç atası" və "Rokki" filmlərinin məşhur musiqiləri səsləndirilib.

Canlı ifa olunan kino musiqiləri festivalın keçirildiyi açıq hava amfiteatrında tamaşaçılar tərəfindən böyük maraqla qarşılanıb.