Nazim Şükürov Azərbaycan Qiymətləndiricilər Cəmiyyəti sədrinin müşaviri təyin edilib

İqtisadçı-alim, hüquqşünas və iqtisad üzrə fəlsəfə doktoru Nazim Şükürov Azərbaycan Qiymətləndiricilər Cəmiyyətinin (AQC) İdarə Heyətinin sədri Vüqar Orucun müşaviri təyin edilib. Bu barədə AQC məlumat yayıb.

Nazim Şükürov dövlət idarəçiliyi, maliyyə, vergi siyasəti, audit, hüquq, investisiya və strateji idarəetmə sahələrində 40 ildən artıq peşəkar təcrübəyə malikdir.

O, müxtəlif illərdə Vergilər Nazirliyində Vergidənyayınmaya Nəzarət İdarəsinin rəisi, İqtisadi Təhlil Baş İdarəsinin rəis müavini və digər rəhbər vəzifələrdə çalışıb. Sonrakı dövrdə Azərbaycan Milli Elmlər Akademiyasının Yüksək Texnologiyalar Parkına rəhbərlik edib, 2022–2024-cü illərdə isə Cəlilabad Rayon İcra Hakimiyyəti başçısının müavini vəzifəsində fəaliyyət göstərib.

Hazırda Nazim Şükürov "Audit Azərbaycan" hüquq və konsaltinq şirkətinin baş direktorudur. O, həmçinin 2024–2025-ci illərdə Dünya Bankı Qrupunun Business Ready (B-READY 2025) proqramında ekspert kimi iştirak edib.