"Binəqədi" yatağında neft hasilatı 3% azalıb

2025-ci ildə Azərbaycanın quruda yerləşən "Binəqədi" yatağından 0,97 milyon barel neft hasil edilib ki, bu da əvvəlki illə müqayisədə 3% azdır.

Bu barədə Hesablama Palatasının Azərbaycan Dövlət Neft Fondunun vəsaitlərinin formalaşdırılması və əsas istiqamətlər üzrə istifadəsinin auditinin nəticələrinə dair hesabatında bildirilir.

Hesabata görə, 2024-cü ildə yataqdan 0,99 milyon barel neft hasil edilməsi nəzərdə tutulsa da, faktiki hasilat 0,97 milyon barel təşkil edib. Bu, proqnozlaşdırılan həcmin 98,25%-nin yerinə yetirilməsi deməkdir.

Məlumata əsasən, 2025-ci ildə hasilat əvvəlki illə müqayisədə 0,03 milyon barel və ya 3% azalıb.

"Binəqədi" neft-qaz yatağı Abşeron yarımadasının şimal-qərbində, Bakı şəhərindən təxminən 9 kilometr məsafədə yerləşir və Azərbaycanın ən qədim neft yataqlarından biri hesab olunur. Yataqda sənaye üsulu ilə neft hasilatına 1896-cı ildə başlanılıb.

2004-cü il sentyabrın 29-da SOCAR ilə "Azen Oil Company B.V." arasında yatağın birgə işlənməsinə dair saziş imzalanıb. 43,5 kvadratkilometr ərazini əhatə edən müqavilə 2005-ci il sentyabrın 1-dən qüvvəyə minib. Hazırda yatağın operatoru "Azen Oil Company B.V." ("Global Energy") şirkətidir. Pay bölgüsü sazişinə əsasən, layihədə SOCAR-ın payı 25%, "Azen Oil Company B.V." şirkətinin payı isə 75% təşkil edir. Hasil olunan neftdən əldə edilən dövlət gəlirləri Azərbaycan Dövlət Neft Fonduna yönəldilir.