Hacıyev: Azərbaycan heç vaxt öz ərazisindən qonşu ölkəyə qarşı istifadəyə imkan verməz

Rəsmi Bakı heç vaxt ölkə ərazisinin qonşu dövlətlərə qarşı istifadə edilməsinə icazə verməyəcək. Bunu Azərbaycan Prezidenti Administrasiyasının Xarici siyasət məsələləri şöbəsinin müdiri Hikmət Hacıyev bildirib.

Türkiyənin "Milliyet" qəzetinə müsahibəsində Hacıyev regiondakı geosiyasi vəziyyətin mürəkkəb olduğunu vurğulayıb.

"Geosiyasi baxımdan regionumuzda vəziyyət çox çətindir. Bakıdan 200 kilometr cənubda İran, ABŞ və İsrail arasında müharibə gedir. 200 kilometr şimalda isə Rusiya-Ukrayna müharibəsi davam edir", – o deyib.

Prezidentin köməkçisi Azərbaycanın ərazisinin İsrailin kəşfiyyat xidməti "Mossad" tərəfindən istifadə edildiyinə dair iddiaları da rədd edib.

"Biz İranı qardaş ölkə hesab edirik. Çünki bizim qardaşlarımız sərhədin, Araz çayının o tayında yaşayır. Ərazilərimizin bütövlüyü və suverenliyi bizim üçün fundamental prinsipdir. Azərbaycan heç vaxt öz ərazisindən qonşu ölkəyə müdaxilə məqsədilə istifadəyə imkan verməz", – Hacıyev bildirib.

Onun sözlərinə görə, bu cür iddiaların texniki baxımdan da əsası yoxdur.

"Bu texniki cəhətdən necə mümkündür? İsraildən buraya necə gələcəklər? Türkiyədən keçməlidirlər. Türkiyə də buna icazə verməz, Azərbaycan da. Bu necə baş verəcəkdi? Burada həm də çirkin təbliğat elementləri var", – Prezident Administrasiyasının rəsmisi qeyd edib.