İran parlamenti ABŞ və İsrail gəmilərinin Hörmüz boğazından keçidini qadağan etməyi müzakirə edir

İran parlamenti ABŞ və İsrail gəmilərinin Hörmüz boğazından keçidini qadağan etməyi, həmçinin Tehranın "düşmən ölkələr" hesab etdiyi dövlətlərdən boğazdan istifadəyə icazə verilməsi üçün kompensasiya tələb etməyi nəzərdə tutan qanun layihəsini müzakirə edir. Bu barədə Bloomberg agentliyi məlumat yayıb.

Məlumata görə, İran və Oman arasında Hörmüz boğazının idarə olunmasına dair hazırlanmış saziş layihəsində İsraillə əlaqəli yüklərin daşınmasının qadağan edilməsi və xüsusi idxal rüsumlarının tətbiqi də nəzərdə tutulur. Layihə hələ yekun təsdiqini almayıb.

ABŞ administrasiyası isə Hörmüz boğazında naviqasiya azadlığının qorunmasını dəstəklədiyini, beynəlxalq gəmiçiliyə hər hansı məhdudiyyət və ya məcburi rüsum tətbiqini qəbul etmədiyini bildirib.


Layihənin qüvvəyə minməsi üçün İranın ali rəhbərliyi tərəfindən təsdiqlənməsi tələb olunur.

Gülnar Nazimqızı