ABŞ Ukraynaya “Patriot” istehsalı üçün lisenziya verməkdən çəkinir - The Telegraph

ABŞ mümkün texnologiya sızması və əqli mülkiyyət riskləri ilə bağlı narahatlıqlar səbəbindən Ukraynaya “Patriot” hava hücumundan müdafiə sistemlərinin istehsalı üçün lisenziya vermək məsələsində geri addım atıb. “The Telegraph” qəzeti bu barədə ABŞ-dakı mənbələrinə istinadən məlumat yayıb.

Mənbələrin bildirdiyinə görə, Vaşinqtonda Ukraynaya “Patriot” sistemlərinin istehsal texnologiyasının verilməsi ilə bağlı ciddi fikir ayrılıqları mövcuddur. ABŞ tərəfi müasir hərbi texnologiyaların Rusiya tərəfindən əldə edilə biləcəyindən ehtiyat edir.

Bundan əlavə, ABŞ administrasiyasının Ukraynaya verilən silahların Avropanın qara bazarına çıxması ilə bağlı narahatlıqları olduğu bildirilir.

Hazırda “Patriot” raket əleyhinə sistemlərinin istehsalı üçün ABŞ-dan lisenziya alan ölkələrin Almaniya və Yaponiya olduğu qeyd edilir.

ABŞ istehsalı olan “Patriot” sistemləri dünyanın ən qabaqcıl hava hücumundan müdafiə platformalarından biri hesab olunur və Ukraynanın Rusiya raket və pilotsuz uçuş aparatlarına qarşı müdafiəsində mühüm rol oynayır.

ABŞ Prezidenti Donald Tramp daha əvvəl NATO sammitində Ukraynaya “Patriot” sistemlərinin istehsalı üçün lisenziya verilməsi ideyasını gündəmə gətirmişdi. O, belə bir imkanın yaradılacağı təqdirdə Ukraynanın raket çatışmazlığından şikayət etməyəcəyini bildirmişdi.

Lakin “The Telegraph”ın mənbələri Tramp administrasiyasının hazırda bu məsələyə əvvəlki qədər müsbət yanaşmadığını bildirirlər. Müzakirələrin əsasını texnologiyanın qorunması, hərbi istehsal üzərində nəzarət və silahların son istifadə təhlükəsizliyi ilə bağlı narahatlıqlar təşkil edir.

Gülnar