Zelenski Məhəmməd bin Salmanla Məkkə sazişini müzakirə edib

Ukrayna Prezidenti Volodimir Zelenski Səudiyyə Ərəbistanının vəliəhd şahzadəsi Məhəmməd bin Salmanla Türkiyə, Səudiyyə Ərəbistanı və Pakistan arasında imzalanmış Məkkə Birgə Müdafiə Sazişini və onun perspektivlərini müzakirə edib.Bu barədə Zelenski "X" hesabında yazıb.

Ukrayna Prezidenti Məhəmməd bin Salmanla telefon danışığını məzmunlu adlandırıb və təhlükəsizliyin möhkəmləndirilməsi məqsədilə ölkəsinin dostları və tərəfdaşları ilə demək olar ki, hər gün əlaqə saxladığını bildirib.

"Elə sahələr var ki, orada Ukrayna və Səudiyyə Ərəbistanı insanların və həyatın qorunması istiqamətində bir-birinin imkanlarını gücləndirə bilər", - Zelenski qeyd edib.

Tərəflər həmçinin Ukrayna ilə Səudiyyə Ərəbistanı arasında pilotsuz uçuş aparatları (PUA) sahəsində əməkdaşlıq çərçivəsində yaxın vaxtlarda atılması planlaşdırılan addımları müzakirə ediblər.

Zelenskinin sözlərinə görə, Məhəmməd bin Salman Səudiyyə Ərəbistanının Türkiyə və Pakistanla imzaladığı sazişlər və onların perspektivləri barədə məlumat verib.

"Ölkələrimizin ərzaq təhlükəsizliyinin təmin edilməsinə töhfəsini artırmaq üçün mövqelərimizi və gələcək təmaslarımızı razılaşdırdıq. Bu, qlobal ehtiyacdır", - Ukrayna Prezidenti bildirib.