Azərbaycan sərhədçiləri peşə bayramını qeyd edir

Azərbaycan sərhəd mühafizəsinin yaradılmasının 107-ci ildönümü tamam olur. Avqustun 18-i ölkədə sərhədçilərin peşə bayramı kimi qeyd edilir.

Azərbaycan Xalq Cümhuriyyəti Parlamentinin 1919-cu il avqustun 18-də dövlət sərhədinin mühafizəsi ilə bağlı qanun qəbul etməsi milli sərhəd mühafizəsinin hüquqi əsasını qoyub. Həmin sənəddən sonra sərhəd mühafizəsinin təşkili Maliyyə Nazirliyinə həvalə edilmişdi.

Müstəqilliyin bərpasından sonra sərhəd mühafizəsi sistemi yenidən formalaşdırılıb. Prezident Heydər Əliyevin 31 iyul 2002-ci il tarixli fərmanı ilə Milli Təhlükəsizlik Nazirliyinin Sərhəd Qoşunları İdarəsinin bazasında Dövlət Sərhəd Xidməti (DSX) yaradılıb.

DSX hazırda sərhəd qoşunları ilə yanaşı, sahil mühafizəsi, sərhəd nəzarəti, çevik qüvvələr, hərbi aviasiya və digər struktur bölmələrdən ibarət vahid sistem kimi fəaliyyət göstərir.

Azərbaycan sərhəd mühafizəsinin inkişafında 1990-cı illərdən etibarən struktur və texniki yenilənmə əsas istiqamətlərdən birinə çevrilib. 2007-ci ildə DSX Akademiyasının yaradılması sərhədçi kadrların hazırlanması sisteminin formalaşdırılmasında mühüm mərhələ olub. Sonrakı illərdə sərhəd bölmələri, nəzarət-buraxılış məntəqələri, sahil mühafizəsi və aviasiya imkanları genişləndirilib.

DSX-nin ən mühüm döyüş təcrübələrindən biri 2020-ci il Vətən müharibəsi olub. Qurumun məlumatına görə, sərhədçilər Füzuli istiqamətindən Ermənistanla dövlət sərhədinədək 105 kilometrlik ərazidə əməliyyatlarda iştirak edib, Xudafərin körpüsü və Zəngilan istiqamətində Azərbaycan bayrağının qaldırılmasında rol oynayıblar. DSX-nin məlumatına əsasən, müharibə zamanı 47 hərbi qulluqçu şəhid olub, 197 nəfər yaralanıb, 12 sərhədçi isə “Vətən Müharibəsi Qəhrəmanı” adına layiq görülüb.

DSX həmçinin müharibə zamanı pilotsuz uçuş aparatlarından istifadə edib. Xidmətin məlumatına görə, “Harop”, “Quzğun” və “Hermes” PUA-larının tətbiqi nəticəsində 290 düşmən hədəfi məhv edilib.

Hazırda DSX-nin rəisi general-polkovnik Elçin Quliyevdir. O, 2002-ci ildə DSX rəisi–Sərhəd Qoşunlarının komandanı təyin edilib və 2017-ci ildə yenidən DSX rəisi vəzifəsinə təyin olunub.

1919-cu ildə hüquqi əsası qoyulan milli sərhəd mühafizəsi ənənəsi beləliklə müstəqil Azərbaycanın dövlət sərhədinin qorunmasına cavabdeh ayrıca hərbi qurumun formalaşmasına qədər inkişaf edib.