Gürcüstan 67 əcnəbini ölkədən deportasiya edib - siyahıda azərbaycanlılar da var

Gürcüstan Daxili İşlər Nazirliyinin Miqrasiya İdarəsi son günlər keçirilən tədbirlər nəticəsində 67 xarici vətəndaşı ölkədən deportasiya edib.

Nazirliyin məlumatına görə, deportasiya olunanlar arasında Türkiyə, Hindistan, Misir, Rusiya, Azərbaycan, Kuba, Ermənistan, Pakistan, Özbəkistan, Belarus, Türkmənistan, Livan, Moldova, Nepal, Nigeriya, Şri-Lanka və Çin vətəndaşları olub.

Deportasiya edilən şəxslərin Gürcüstana girişinə qanunvericiliyə uyğun olaraq qadağa qoyulub.

Gürcüstan Miqrasiya İdarəsi ölkədə qanuni əsas olmadan qalan əcnəbilərin müəyyənləşdirilməsi və ölkədən çıxarılması ilə məşğul olan əsas qurumlardan biridir. Qurumun fəaliyyəti qanunsuz miqrasiyanın qarşısının alınmasına və əcnəbilərin ölkədə qalma statusunun yoxlanılmasına yönəlib.

Gürcüstan 2026-cı ildə miqrasiya nəzarətini sərtləşdirib. Daxili İşlər Nazirliyinin məlumatına görə, ilin ilk altı ayında 2 036 qanunsuz miqrant ölkədən deportasiya edilib. Bu göstərici əvvəlki ilin bütün göstəricisini üstələyib.

Miqrasiya İdarəsinin oxşar əməliyyatları nəticəsində iyun ayında 94, iyulda isə 96 xarici vətəndaş Gürcüstandan deportasiya edilmişdi. Deportasiya olunanlar arasında Azərbaycan vətəndaşları da olub.