Prezident Esvatini Kralını təbrik edib

Azərbaycan Prezidenti İlham Əliyev Esvatini Krallığının Kralı III Msvatini ölkənin Milli Günü – Müstəqillik Günü münasibətilə təbrik edib.

Dövlət başçısı təbrik məktubunda Azərbaycan ilə Esvatini arasında münasibətlərin inkişafı üçün əlverişli şəraitin formalaşdığını bildirib.

İlham Əliyev III Msvatinin cari ilin mayında BMT-nin Ümumdünya Şəhərsalma Forumunun (WUF13) 13-cü Sessiyasında iştirak etmək üçün Azərbaycana səfərini ölkələr arasında əlaqələrin tarixində xüsusi hadisə kimi qiymətləndirib.

Prezident görüş zamanı aparılan fikir mübadiləsini xoş təəssüratlarla xatırladığını qeyd edib.

“İnanıram ki, xalqlarımızın mənafelərinə uyğun olaraq ölkələrimiz arasında dostluq münasibətlərini möhkəmləndirmək, əməkdaşlığımızın potensialından tam bəhrələnmək üçün bundan sonra da birgə səylər göstərəcəyik”, – təbrikdə deyilir.

İlham Əliyev III Msvatini möhkəm cansağlığı və fəaliyyətində uğurlar, Esvatini xalqına isə əmin-amanlıq və rifah arzulayıb.