Keyfiyyətli bağça tərbiyəçisi hazırlamaq iki və ya beş illik iş deyil - nazir

Azərbaycanda məktəbəqədər təhsilin əhatə səviyyəsi 14%-dən 45%-ə yüksəlsə də, uşaq bağçalarında təhsilin keyfiyyəti ilə bağlı problemlər qalır. Bunu elm və təhsil naziri Emin Əmrullayev bildirib.

Onun sözlərinə görə, bağçalar 2022-ci ildə Təhsil Nazirliyinin tabeliyinə verildikdən sonra aparılan qiymətləndirmə zamanı işçilərin təxminən 50%-nin müvafiq ixtisas üzrə diplomunun olmadığı müəyyən edilib.

“Keyfiyyətli bağça tərbiyəçisi hazırlamaq iki və ya beş illik iş deyil. Bu, çox fundamental məsələdir. Tərbiyəçi uşaq psixologiyasını bilməli və təhsil işçisi kimi hazırlanmalıdır”, - Əmrullayev deyib.

Nazir məktəbəqədər təhsilin əhatə dairəsinin 14%-dən 45%-ə yüksəlməsini ciddi artım adlandırıb və kəmiyyət üzrə planın icra edildiyini bildirib.

Onun sözlərinə görə, məktəbəhazırlıq proqramlarının genişləndirilməsi xüsusilə regionlarda mühüm əhəmiyyət daşıyır.

Əmrullayev məktəbəqədər təhsildə yeni yerlərin yaradılması üçün dövlət-özəl tərəfdaşlığı modelinə böyük ümid bəsləndiyini deyib.

Layihə çərçivəsində regionlarda özəl bağçaların sayının artırılması nəzərdə tutulur.

Nazir bildirib ki, az sayda uşağın qeydiyyatda olduğu və faktiki fəaliyyət göstərməyən bəzi bağçalar optimallaşdırılıb, boş qalan imkanlar tələbatın yüksək olduğu müəssisələrə yönəldilib.

Onun sözlərinə görə, bağçalarda qidalanmanın təşkili sahəsində də irəliləyiş əldə olunub.

Əmrullayev kəmiyyət üzrə artıma baxmayaraq, ixtisaslı kadrların hazırlanması, mövcud işçi heyətinin yenilənməsi və keyfiyyətli məktəbəqədər təhsil sisteminin qurulmasının uzunmüddətli proses olacağını bildirib.

Gülnar Nazimqızı