Deputat Azərbaycanda Səhiyyə və Süni İntellekt Mərkəzinin yaradılmasını təklif edib

Azərbaycanda Səhiyyə və Süni İntellekt Mərkəzinin yaradılması təklif olunub.Bu təkliflə Milli Məclisin deputatı Müşfiq Məmmədli çıxış edib.

Onun sözlərinə görə, icbari tibbi sığortanın tətbiqindən sonra ölkənin səhiyyə sistemində geniş analitik imkanlara malik məlumat bazası formalaşıb.

Şəxsi məlumatların qorunması şərtilə həmin məlumatlardan xəstəliklərin epidemiologiyasının öyrənilməsi, tibbi xidmətlərə tələbatın və səhiyyə xərclərinin proqnozlaşdırılması üçün istifadə etmək mümkündür.

Deputat Azərbaycan dilində süni intellekt həllərinin hazırlanmasını və yerli “healthtech” startaplarının dəstəklənməsini də vacib sayıb.

“Gənc mühəndislər və proqramçılar həkimlərlə birlikdə tibbi cihazlar, telemetriya sistemləri, mobil səhiyyə tətbiqləri və süni intellekt məhsulları yarada bilərlər”, – Məmmədli bildirib.

Onun sözlərinə görə, perspektivli həllər TƏBİB-in tabeliyindəki və özəl tibb müəssisələrində sınaqdan keçirilə bilər.

Məmmədli həmçinin tibb və texnologiya təhsilinin inteqrasiyasına ehtiyac olduğunu deyib.
“Gələcəyin həkimi yalnız klinik biliklərə deyil, rəqəmsal səhiyyə, tibbi məlumatların təhlili və süni intellekt haqqında baza biliklərinə də malik olmalıdır”, - deputat bildirib.

O, Səhiyyə və Süni İntellekt Mərkəzinin yaradılması imkanlarının müzakirəsi üçün aidiyyəti qurumların iştirakı ilə dəyirmi masaların keçirilməsini də təklif edib.

Gülnar Nazimqızı