CNN, MS NOW və Politico Tramp administrasiyasını məhkəməyə verib

CNN, MS NOW və Politico ABŞ Prezidenti Donald Tramp administrasiyasının jurnalistlərinin Ağ Evə girişini məhdudlaşdırmasına qarşı məhkəməyə müraciət edib.

Media qurumları iddia ərizəsində qərarın ABŞ Konstitusiyasının Birinci Düzəlişi ilə qorunan mətbuat azadlığını pozduğunu bildiriblər. Onlar məhkəmədən qadağanın dayandırılmasını və jurnalistlərinin Ağ Evə girişinin bərpa edilməsini istəyirlər.

Tramp sentyabrın 18-də CNN, MS NOW və Politico-nun Ağ Evə girişinin qadağan edildiyini açıqlayıb. Ertəsi gün üç media qurumunun jurnalistləri Ağ Ev ərazisinə buraxılmayıb və onların akkreditasiyaları ləğv edilib.

Tramp qərarını bu media qurumlarının administrasiya haqqında “saxta xəbərlər” yaydığını iddia etməklə əsaslandırıb və digər media təşkilatlarına qarşı da analoji addımların atıla biləcəyini bildirib.

CNN, MS NOW və Politico isə jurnalistlərin əvvəlcədən xəbərdarlıq edilmədən və yayımladıqları materialların məzmununa görə Ağ Evə girişdən məhrum edildiyini iddia edir.

Tramp administrasiyası isə Ağ Evə girişin media üçün hüquq deyil, imtiyaz olduğunu bildirərək qərarı müdafiə edib. Vitse-prezident J.D. Vance də üç media qurumunun öz fikirlərini ifadə etmək və administrasiyanın fəaliyyətini işıqlandırmaq imkanlarının davam edəcəyini, lakin Ağ Evdə xüsusi iş yerlərinə sahib olmayacaqlarını deyib.

Qadağadan sonra CNN və MS NOW jurnalistləri Ağ Evin ərazisinə bitişik yerlərdən canlı yayımlara başlayıblar. CNN-in Ağ Evdəki girişinin məhdudlaşdırılması prezidentin tədbirlərinin televiziya ilə yayımlanması üçün istifadə olunan media hovuzuna da təsir edib. ABC, CBS, NBC və Fox News CNN-in yerinə hovuz yayımını həyata keçirməkdən imtina edib.

Məhkəmə işi Vaşinqtondakı federal məhkəmədə araşdırılacaq. CNN, MS NOW və Politico məhdudiyyətlərin onların jurnalist fəaliyyətinə və ictimaiyyətin hökumətin fəaliyyəti barədə müstəqil məlumat əldə etmək imkanına təsir etdiyini bildirirlər.

Gülnar Nazimqızı