Ceyhun Bayramov BMT baş katibi ilə regional və qlobal məsələləri müzakirə edib

Azərbaycanın xarici işlər naziri Ceyhun Bayramov BMT Baş Assambleyasının 81-ci sessiyası çərçivəsində BMT-nin baş katibi Antonio Quterreşlə görüşüb.Bu barədə Azərbaycanın Xarici İşlər Nazirliyi (XİN) "X" sosial şəbəkəsində məlumat yayıb.

Görüşdə regional və beynəlxalq gündəmdəki məsələlər, Azərbaycanın BMT və onun ixtisaslaşmış qurumları ilə əməkdaşlığı, eləcə də çoxtərəflilik və beynəlxalq hüquqa verdiyi töhfələr müzakirə olunub.

Tərəflər Azərbaycanın donor ölkə kimi fəaliyyəti və humanitar təşəbbüsləri barədə də fikir mübadiləsi aparıblar.

Görüşdə qlobal iqlim fəaliyyəti və dayanıqlı inkişaf məsələlərinə də toxunulub. Azərbaycanın COP29-a ev sahibliyi, həmçinin bərpaolunan enerji, nəqliyyat və regional bağlantı sahələrində rolu qeyd edilib.

Bayramov Azərbaycan-Ermənistan münasibətlərinin normallaşması prosesində son irəliləyişlər barədə məlumat verib. Nazir həmçinin Cənubi Qafqazda etimadın qurulması, keçmiş məcburi köçkünlərin geri qayıtması üçün aparılan bərpa-quruculuq işləri və minatəmizləmə fəaliyyəti barədə danışıb.