Macarıstan parlamenti Peter Magyarın toxunulmazlığını ləğv edib

Macarıstan parlamenti Baş nazir Peter Magyarın toxunulmazlığını ləğv edib. Qərar 139 deputatın lehinə səsi ilə qəbul olunub, əleyhinə və bitərəf səs verən olmayıb.

Bununla 2024-cü ildə baş verdiyi bildirilən mobil telefon insidenti ilə bağlı Magyar barəsində istintaqın davam etdirilməsinə hüquqi imkan yaranıb. Macarıstan prokurorluğu onun Budapeştdə gecə klubunda mübahisə zamanı başqa şəxsin mobil telefonunu götürdüyünü və daha sonra cihazı Dunay çayına atdığını iddia edir. Telefon daha sonra dalğıclar tərəfindən sudan çıxarılıb.

Hadisə 2024-cü il iyunun 21-də baş verib. Həmin vaxt Magyar Avropa Parlamentinin deputatı idi. Avropa Parlamenti 2025-ci ilin oktyabrında Macarıstan hakimiyyətinin onun toxunulmazlığının ləğvi ilə bağlı əvvəlki müraciətini təmin etməmişdi.

Magyar telefonun götürülməsi faktını etiraf edib, lakin hadisənin prokurorluğun təqdim etdiyi formada baş verdiyini və ona qarşı siyasi təxribat təşkil edildiyini rədd edir. O, istintaqla əməkdaşlığa hazır olduğunu bildirib və parlament toxunulmazlığının ləğv edilməsini özü də istəyib.

 Magyar 2026-cı ilin mayında Avropa Parlamentindəki mandatının başa çatmasından sonra Macarıstan Milli Assambleyasının üzvü olub və baş nazir seçilib. Onun rəhbərlik etdiyi Tisza Partiyası parlamentdə çoxluğa sahibdir.

Aytac Zeynalova