Ceyhun Məmmədov süni intellekt və sosial media ilə bağlı ayrıca qanunlar təklif edib

Azərbaycanda süni intellektdən istifadənin təhlükəsizlik tələbləri və sosial media platformalarının fəaliyyəti ilə bağlı ayrıca qanunların qəbul edilməsi təklif olunur. Bunu deputat Ceyhun Məmmədov Milli Məclisdə çıxışı zamanı deyib.

Onun sözlərinə görə, süni intellekt və sosial media sürətlə gündəlik həyatın bir hissəsinə çevrilir, bu proseslərin idarə olunması isə getdikcə mürəkkəbləşir.

“Xüsusilə sosial mediada baş verənlər, aparılan müzakirələr və məqsədli şəkildə kənardan edilən müdaxilələr bizi ciddi düşündürür. Süni intellektdən düzgün istifadə və təhlükəsizlik məsələləri nəzərə alınmaqla həm süni intellekt, həm də sosial media ilə bağlı ayrıca qanunların qəbuluna ehtiyac var”, - deputat bildirib.

Məmmədov qeyd edib ki, tənzimləmə tədbirləri vaxtında həyata keçirilməsə, gələcəkdə bu sahədə problemlər daha mürəkkəb xarakter ala bilər.

Deputat təhsil qanunvericiliyinin də yenilənməsini təklif edib. Onun fikrincə, “Təhsil haqqında” Qanuna yenidən baxılmalı, “Ali təhsil haqqında” və “Distant təhsil haqqında” ayrıca qanunlar hazırlanmalıdır. Gələcəkdə vahid Təhsil Məcəlləsinin qəbul edilməsi də məqsədəuyğun olardı.
Ceyhun Məmmədov, həmçinin milli-mənəvi və ailə dəyərlərinin qorunması üçün hüquqi bazanın gücləndirilməsini istəyib.

“Dünyada dəyərlərin sürətli transformasiyası gedir. Milli-mənəvi dəyərlərin qorunması üçün hüquqi bazanın yaradılmasını təklif edirəm”, - o deyib.

Deputat ailə institutunun üzləşdiyi risklərin qarşısının alınması məqsədilə əlavə qanun və qərarların qəbuluna ehtiyac olduğunu da bildirib.

Gülnar Nazimqızı