Azay Quliyev qanunsuz tapşırıqdan imtina edən dövlət qulluqçularının qorunmasını təklif edib

Qanunsuz tapşırıqları yerinə yetirməkdən imtina edən və dövlət qurumlarındakı neqativ hallar barədə şikayət verən qulluqçuların təqib və qisas xarakterli təzyiqlərdən qorunması üçün ayrıca mexanizm yaradılmalıdır. Bunu deputat Azay Quliyev Dövlət Qulluğu Məcəlləsinin layihəsinin Milli Məclisdə müzakirəsi zamanı deyib.

Onun sözlərinə görə, layihədə dövlət qulluqçusunun qanunsuz tapşırığın icrasından imtina etmək və neqativ hallar barədə şikayət vermək hüququnun təsbit edilməsi müsbət addımdır. Lakin bu hüquqdan istifadə edən şəxslərin sonradan təzyiqlə üzləşməməsi üçün əlavə təminatlara ehtiyac var.

“Elə mexanizm formalaşdırmalıyıq ki, bu hüquqdan istifadə edən, şikayət verən və ya neqativ hallarla bağlı məsələ qaldıran şəxslər sonradan təqibə məruz qalmasın, onlara qisas məqsədilə təzyiq göstərilməsin”, - deputat bildirib.

Quliyev bu müdafiə mexanizminin etik müvəkkillərə də şamil edilməsini təklif edib.
Deputat dövlət qulluqçularının xidmət müddətinin hər dəfə bir il olmaqla beş dəfəyədək uzadılmasını nəzərdə tutan müddəanı da dəstəkləyib.

Bununla yanaşı, o, qərarın hansı meyarlar əsasında veriləcəyinin layihədə dəqiq göstərilməsini istəyib.
Onun fikrincə, açıq meyarların müəyyənləşdirilməsi həm dövlət orqanı rəhbərinin qərar qəbul etməsini asanlaşdırar, həm də qulluqçuların xidmət müddətinin uzadılması imkanlarını əvvəlcədən bilməsinə şərait yaradar.

Azay Quliyev, həmçinin dövlət qurumlarının etik davranış qaydalarına dair illik hesabatlarında əks olunan pozuntuların adlar və qurumlar göstərilmədən ümumiləşdirilməsini və digər dövlət orqanlarına göndərilməsini təklif edib.

Gülnar Nazimqızı