Bakıda çörək sexində nöqsanlar aşkarlanıb – fəaliyyət məhdudlaşdırılıb

Qida Təhlükəsizliyi Agentliyi (AQTA) mediada yayılan məlumat əsasında Bakının Xətai rayonunda fəaliyyət göstərən çörək sexində plandankənar yoxlama keçirib.

Yoxlama Musayev Rövşən Vahid oğluna məxsus Vunqtau küçəsi, 23 ünvanındakı obyektdə aparılıb.

AQTA-nın məlumatına görə, yoxlama zamanı müəssisənin qida təhlükəsizliyi qeydiyyatının olmadığı, anbar sahəsinin yaradılmadığı və un kisələrinin istehsal sahəsində saxlanıldığı müəyyən edilib.

Həmçinin çörəyin bişirilməsi və soyudulması proseslərinin eyni sahədə aparıldığı, hazır məhsulların isə qablaşdırılmadan və etiketlənmədən qutulara yığılaraq antisanitar şəraitdə daşındığı aşkarlanıb.

Faktla bağlı inzibati protokol tərtib edilib və müəssisənin fəaliyyəti nöqsanlar aradan qaldırılanadək məhdudlaşdırılıb.