Ukraynada təxminən 11 min mülki şəxs itkin düşmüş şəxslər reyestrinə daxil edilib-Lubinets

Ukraynada təxminən 11 min mülki şəxsin adı xüsusi şəraitdə itkin düşmüş şəxslərin vahid reyestrinə daxil edilib. Bunu Ukrayna Ali Radasının İnsan Hüquqları üzrə Komissarı Dmitro Lubinets oktyabrın 8-də Bakıda keçirilən beynəlxalq konfransda çıxışı zamanı bildirib.

Lubinets deyib ki, Rusiya tərəfindən mülki şəxslərin özbaşına həbs edilməsi və mühakimə olunmasının qarşısını almaq üçün hazırda kifayət qədər mexanizm yoxdur.

“Biz hər gün Rusiya Federasiyasının Cenevrə Konvensiyasını və beynəlxalq humanitar hüququ pozduğunu, minlərlə mülki şəxsi özbaşına həbs etdiyini və məhkum etdiyini görürük. Lakin bununla bağlı nə edə biləcəyimizə dair heç bir mexanizmə malik deyilik”, - o bildirib.

Onun sözlərinə görə, reyestrdə beynəlxalq təşkilatların nümayəndələri, jurnalistlər, yerli və dini icmaların üzvləri də daxil olmaqla müxtəlif kateqoriyalardan olan şəxslər yer alır.

Lubinets qeyd edib ki, ATƏT-in üç rəsmi əməkdaşı da Rusiya tərəfindən həbs edilərək məhkum olunub.

“Bu siyahıda jurnalistlər, yerli icmaların nümayəndələri, dini icmaların nümayəndələri də var” - komissar əlavə edib.

Ukraynanın rəsmi məlumatlarına görə, xüsusi şəraitdə itkin düşmüş şəxslərin vahid reyestri müharibə, döyüş əməliyyatları və işğal nəticəsində itkin düşən şəxslər barədə məlumatların sistemləşdirilməsi üçün yaradılıb.

Aytac Zeynalova