Dələduzluqda ittiham olunan Azərbaycan vətəndaşı Rusiyadan ekstradisiya edilib

Dələduzluqda ittiham olunan Azərbaycan vətəndaşı Anar Abbasov Rusiyadan Azərbaycana ekstradisiya edilib.

Baş Prokurorluğun məlumatına görə, Abbasovun ekstradisiyası ilə bağlı vəsatət Rusiya Federasiyasının Baş Prokurorluğu tərəfindən təmin edilib.

Abbasov Ağstafa Rayon Polis Şöbəsində ibtidai istintaqı aparılan cinayət işi üzrə təkrarən qulluq mövqeyindən istifadə etməklə xeyli miqdarda ziyan vurmaqla dələduzluq etməkdə şübhəli bilinir.

İstintaq çərçivəsində onun barəsində təqsirləndirilən şəxs qismində cəlb etmə haqqında qərar qəbul edilib. İstintaqdan yayınaraq gizləndiyinə görə Abbasov axtarışa verilib.

O, Rusiyada saxlanılıb və Ədliyyə Nazirliyinin aidiyyəti qurumları tərəfindən Azərbaycana gətirilib.

Ekstradisiya 7 oktyabr 2002-ci il tarixli “Mülki, ailə və cinayət işləri üzrə hüquqi yardım və hüquqi münasibətlər haqqında” Konvensiyanın tələblərinə uyğun həyata keçirilib.

Abbasovun cinayət törətməsi barədə şübhələr istintaq materiallarına əsaslanır. Onun təqsiri məhkəmənin qanuni qüvvəyə minmiş hökmü ilə müəyyən edilməyib.