Azərbaycan iqtisadiyyatına 4 ilə 108,8 milyard manat investisiya qoyulacaq - komitə sədri

Azərbaycan iqtisadiyyatına 2027-2030-cu illərdə 108,8 milyard manat investisiya qoyulacağı, bunun 76,6 milyard manatının qeyri-neft sektoruna yönələcəyi gözlənilir. Bunu Milli Məclisin Aqrar siyasət komitəsinin sədri Tahir Rzayev deyib. 

“Məhsuldarlığı və istehsalı artırmaq, müasir texnologiyaların tətbiqini gücləndirmək, dövlət dəstəyini artırmaq, əhalinin kənddə qalıb işləməsini təmin etmək və ilk növbədə insan rifahını yüksəltmək” aqrar sahənin əsas hədəfləridir, komitə sədri deyib.

Onun sözlərinə görə, aqrar sektorda qanunvericilik bazasının yenilənməsi üçün bir sıra qanun layihələri hazırlanıb. Balıqçılıq və toxumçuluq haqqında qanunlar Milli Məclisin ötən sessiyasında qəbul edilib. Məhsul şəhadətnaməsi haqqında qanun layihəsi parlamentə daxil olub, aqrar sahəyə dair çərçivə qanun layihəsinin isə yaxın günlərdə plenar iclasda müzakirəsi gözlənilir.

“İnvestisiya olmadan heç bir iqtisadiyyat inkişaf edə bilməz”, - komitə sədri bildirib.

Onun sözlərinə görə, son illərdə Azərbaycan iqtisadiyyatına 350 milyard dollar investisiya qoyulub, iki beynəlxalq investisiya forumunda imzalanan müqavilələrin ümumi dəyəri isə 20 milyard dolları ötüb.

Komitə sədri işğaldan azad edilmiş ərazilərdə bərpa və tikinti işlərinə 28 milyard manatın Azərbaycanın öz vəsaiti hesabına yönəldildiyini deyib. Qarabağ və Şərqi Zəngəzurun gələcək inkişafı üçün yeni investisiyaların cəlb olunmasının vacib olduğunu vurğulayıb.

Gülnar Nazimqızı