TRACECA: Orta Dəhlizdə tranzit müddətinin proqnozlaşdırılması və rəqəmsallaşma vacibdir

Orta Dəhlizin rəqabət qabiliyyətinin yüksəldilməsi üçün daşımaların təhlükəsizliyinin təmin edilməsi ilə yanaşı, tranzit müddətlərinin əvvəlcədən dəqiq müəyyənləşdirilməsi və rəqəmsal həllərin tətbiqi zəruridir. Bunu TRACECA Hökumətlərarası Komissiyasının Daimi Katibliyinin baş katibi Casurbek Çoriyev Avropa İttifaqı–Azərbaycan Biznes Forumunda çıxışı zamanı bildirib.

Onun sözlərinə görə, yükdaşıma şirkətləri üçün yüklərin təyinat məntəqəsinə çatdırılma vaxtını əvvəlcədən müəyyənləşdirmək mühüm əhəmiyyət kəsb edir. Tranzit müddətində qeyri-müəyyənlik isə biznes üçün əlavə çətinliklər yaradır və Orta Dəhlizə etimadı zəiflədir.

Baş katib qeyd edib ki, altı ölkə arasında vahid tranzit icazəsi haqqında sazişin qəbul edilməsi yükdaşımaların sadələşdirilməsi istiqamətində mühüm addımdır. Bu mexanizm Azərbaycan, Qazaxıstan və Qırğızıstanın da daxil olduğu ölkələrdə vahid icazə əsasında daşımaların həyata keçirilməsinə, müxtəlif nəqliyyat növlərindən istifadəyə və hər ölkə üzrə ayrıca icazə alınması zərurətinin aradan qaldırılmasına şərait yaradır.

Çoriyev vurğulayıb ki, icazələrin elektron formada təqdim edilməsi də daşımalar prosesinin asanlaşdırılmasına xidmət edir. Bununla yanaşı, 2016-cı ildən tətbiq edilən çoxtərəfli icazələr sisteminin genişləndirilməsi və nəqliyyat sənədlərinin rəqəmsallaşdırılması prioritet istiqamətlər olaraq qalır.

O bildirib ki, rəqəmsal prosedurların səmərəli tətbiqi üçün TRACECA üzvü olan ölkələr arasında elektron imzaların qarşılıqlı tanınması və aidiyyəti qurumlar arasında koordinasiyanın gücləndirilməsi vacibdir.

Aytac