Azərbaycanda 9 ayda qeydə alınan cinayətlərin 90,5%-i açılıb - DİN

2026-cı ilin yanvar-sentyabrında Azərbaycanda əməliyyat-axtarış və istintaq fəaliyyətinin subyekti olan dövlət qurumları üzrə qeydə alınmış 22 804 cinayətin 90,5%-nin açılması təmin edilib. Bu barədə Daxili İşlər Nazirliyindən bildirilib. 

Daxili İşlər Nazirliyi və prokurorluq üzrə qeydə alınan cinayətlərin açılma göstəricisi 93,7% olub.

Ötən ilin müvafiq dövrü ilə müqayisədə cinayətlərin ümumi sayı 5,7% azalıb.

Hesabat dövründə ağır və xüsusilə ağır cinayətlər, qeyri-aşkar şəraitdə törədilən əməllər, adam öldürməyə cəhdlər, qəsdən sağlamlığa ağır və az ağır zərər vurma, mülkiyyət əleyhinə cinayətlər, o cümlədən oğurluq, dələduzluq, quldurluq və hədə-qorxu ilə tələb etmə hallarının sayı azalıb.

Həmçinin avtonəqliyyat vasitələrinin qaçırılması, xuliqanlıq, yetkinlik yaşına çatmayanlar tərəfindən törədilən, odlu silahın tətbiqi ilə və qrup halında baş verən hüquqazidd əməllərin sayında azalma qeydə alınıb.

Qeyri-aşkar şəraitdə törədilən, ağır və xüsusilə ağır cinayətlərin, əzab vermə, mülkiyyət əleyhinə cinayətlərin, o cümlədən oğurluq və dələduzluq hallarının açılması yaxşılaşıb.

Qəsdən adam öldürmə və cibgirlik cinayətlərinin açılması isə tam təmin edilib.

Gülnar Nazimqızı