Müasir rus etnoimperializminin ideoloqlarından biri və öz millətçi çıxışları ilə yadda qalan rusiyalı yazıçı Aleksandr Proxanov gözlənilmədən sensasiyalı açıqlama verərək, qazaxlardan dizi üstə üzr istəməyi vacib bilib.

Axar.az-ın Qazaxıstan mətbuatına istinadən xəbərinə görə, o bu barədə Moskvada fəaliyyət göstərən mərkəzi radio-stansiyaların birində canlı yayıma qoşulan dinləyicinin suallarını cavablandırarkən deyib.

Tərəflər arasındakı dialoqdan bəzi hissələri diqqətə çatdırırıq:

Dinləyici: - Mən Qazaxıstanın şimal əraziləri ilə bağlı “Seliger”də verilən suala toxunmaq istərdim və bəzi məqamları təhlükəli sayıram. Putin qazaxların dövlətçilik məsələsini gündəmə gətirdi. Amma baxın, görün bu gün nələr baş verir – Nazarbayev və onun çevrəsindəki şəxslər Avrasiya Birliyindən çıxmağı gündəmə gətiriblər. Bu bizim üçün dəhşətdir. Sonuncu müttəfiqimiz də bizə düşmən gözündə baxır. Biz qardaş ölkə olan Qazaxıstandan necə üzr istəməliyik?

Proxanov: - Düşünürəm ki, boğazımıza kəndiri bağlayıb dizi üstə Moskvadan Astanaya hərəkət etməliyik. Yəqin 4 günə ora çatarıq və bu vəziyyətdə - bizi dizi üstə görən qazax dostlarımız dediklərimizi bağışlayar.

Xatırladaq ki, bir neçə gün bundan öncə gənclərlə keçirilən forumda Prezident Vladimir Putin Rusiya-Qazaxıstan əlaqələrinə toxunub. Bildirib ki, bu vaxta qədər qazaxların dövləti olmayıb. Bu yanaşma Qazaxıstanda ciddi etiraza səbəb olub.

ANN.Az