Prezident Administrasiyasının rəhbəri Samir Nuriyev ədliyyə naziri Fərid Əhmədovu kollektivə təqdim edib. Bu barədə Azərtag Dövlət Xəbər agentliyi məlumat verib.
Prezident Administrasiyasının rəhbəri bildirib ki, dövlət başçısının təsdiq etdiyi qanunvericilik aktları ilə Ədliyyə Nazirliyinin yeni fəaliyyət istiqamətləri, vəzifə və hüquqları, ədliyyə orqanlarında qulluq keçmənin qaydaları və şərtləri müəyyən olunub, ədliyyə orqanlarının inkişaf etdirilməsi məqsədilə müvafiq addımlar atılıb.
Fərid Əhmədov 1979-cu ildə Bakıda anadan olub. O, 2000-ci ildə Bakı Dövlət Universitetində (BDU) hüquqşünaslıq ixtisası üzrə bakalavr, 2002-ci ildə Beynəlxalq hüquq üzrə magistr təhsili, 2003-cü ildə "Chevening” təqaüdçüsü olaraq İngiltərənin Esseks Universitetində beynəlxalq insan hüquqları ixtisası üzrə magistr dərəcəsi alıb. 2009-cu ildə doktorantura pilləsi üzrə təhsilini almaq məqsədilə İngiltərənin Oksford Universitetinə "Weidenfeld” təqaüdçüsü olaraq daxil olub. 2016-cı ildə Oksford Universitetinin hüquq üzrə fəlsəfə doktoru elmi dərəcəsini alıb.
2006-2007-ci illərdə Milli Məclis Aparatının İnzibati və Hərbi qanunvericilik şöbəsində məsləhətçi vəzifəsində çalışıb. 2015-2017-ci illərdə "Azərbaycan” Universitetinin rektoru olub. 2017-2020-ci illərdə "Bakı Beynəlxalq Dəniz Ticarət Limanı” QSC-də baş direktorun müavini vəzifəsində çalışıb.
2021-ci ildə nəqliyyat, rabitə və yüksək texnologiyalar nazirinin müşaviri təyin edilib. Prezident İlham Əliyevin 2022-ci il 24 may tarixli sərəncamı ilə rəqəmsal inkişaf və nəqliyyat nazirinin müavini təyin edilib.
2000-ci il aprelin 19-dan 2024-cü il fevralın 14-ə kimi Azərbaycanın ədliyyə naziri vəzifəsini Fikrət Məmmədov icra edib.
Fevralın 16-dan yeni ədliyyə naziri Fərid Əhmədov təyin olunanadək ədliyyə naziri vəzifəsini müvəqqəti olaraq ədliyyə nazirinin müavini Azər Cəfərov icra edib.
Xalidə Əliyeva
www.anews.az
Bizi sosial şəbəkələrdə izləyin !
