UFC Bakıda ilk dəfə keçirilir

Qarışıq döyüş sənətlərinin (MMA) ən nüfuzlu təşkilatı olan UFC bu gün tarixində ilk dəfə olaraq Azərbaycanda turnir keçirir. “UFC Fight Night” tədbiri axşam saatlarında “Baku Crystal Hall”da baş tutacaq.

Gecənin əsas döyüşündə amerikalı döyüşçülər – keçmiş yüngül-ağır çəki çempionu və reytinqdə 4-cü pillədə qərarlaşan Camaal Hill 7-ci pillədə olan Xalil Rauntree ilə qarşılaşacaq.

Tədbirdə azərbaycanlı azarkeşlərin əsas diqqəti üç yerli döyüşçüyə yönəlib. “Ataman” ləqəbli Rafael Fiziev yüngül çəki dərəcəsində (70 kq) çilili İqnacio Baamondeslə qarşılaşacaq. 11-ci yerdə olan Fiziev son üç döyüşündə uduzub və doğma publika qarşısında uğursuz seriyanı qırmağa çalışacaq.

UFC-də debüt edəcək daha bir azərbaycanlı, keçmiş Rizin çempionu Tofiq Musayev olacaq. O, kirgiziyalı Mıktybek Orolbay ilə üz-üzə gələcək. Döyüş aralıq çəki dərəcəsində (75 kq) baş tutacaq, çünki Orolbay yüngül çəki limitini aşa bilməyib. Musayevin MMA-da 22 qələbəsi (18-i nokautla) və 5 məğlubiyyəti var.

Gecədə ilk olaraq oktaqona çıxacaq azərbaycanlı isə Nazim Sadıxovdur. Onun rəqibi braziliyalı Nikolas Motta olacaq. Sadıxov UFC-də keçirdiyi dörd döyüşdə 3 qələbə və 1 heç-heçə əldə edib.

Bakıda keçirilən UFC turnirinə məşhur simalar da qatılıb. Aralarında Həbib Nurməhəmmədov, İslam Maxaçev, Merab Dvalişvili, Umar Nurməhəmmədov və Maykl Bispinq də var.

Tədbirin ilkin döyüşləri saat 20:00-da, əsas döyüşlər isə 23:00-da başlayacaq.

N.Təbrizli