Kiyev Türkiyədə Rusiya ilə görüşün keçiriləcəyini təkzib edib – Yenilənib

Ukraynanın xarici işlər naziri Andriy Sibiha aprelin 15-i və 16-da Türkiyədə keçiriləcəyi deyilən Qara dənizdə təhlükəsizlik üzrə Rusiya ilə danışıqların planlaşdırılmadığını açıqlayıb.Bu barədə TSN-in aparıcısı Alla Mazur bildirib.

“Andriy Sibiha bildirib ki, belə bir görüş planlaşdırılmayıb”, – jurnalist vurğulayıb.

Daha əvvəl “CNN Türk” Türkiyə Müdafiə Nazirliyindəki mənbələrə istinadən yazmışdı ki, 15-16 aprel tarixlərində Ankarada Hərbi Dəniz Qüvvələri komandanlığının qərargahında Qara dənizdə sülhün qorunması məsələsi ilə bağlı Rusiya və Ukrayna nümayəndələrinin görüşü keçiriləcək.

Bununla yanaşı, “TRT Haber” görüşdə müəyyən xarici dövlətlərin “hərbi nümayəndələrinin” də iştirak edəcəklərini bildirmişdi.

17:02

Rusiya və Ukrayna nümayəndələri aprelin 15-16-da Türkiyədə görüşəcəklər.Bu barədə Türkiyənin Milli Müdafiə Nazirliyindən bildirilib.

Tərəflər Ankarada bir araya gələcəklər.

“Aprelin 15-16-da Türkiyə Hərbi Dəniz Qüvvələri Komandanlığının qərargahında Rusiya və Ukrayna arasında mümkün atəşkəs fonunda Qara dənizdə təhlükəsizlik məsələləri ilə bağlı toplantı keçiriləcək. Xarici ölkələrin hərbi nümayəndələrinin iştirakı ilə Qara dənizdə sülhün qorunması üçün hərbi planlaşdırmanın dəniz aspekti müzakirə olunacaq”, - məlumatda vurğulanıb.