2024-cü ildə sığorta sektorunun aktivləri 1 milyard manatı keçib

Azərbaycanda sığorta sektorunun ümumi aktivləri 2024-cü ilin sonuna 1 milyard manatı keçib. Bu barədə Mərkəzi Bankın hesabatında bildirilir. 

Sektorun həm həyat, həm də qeyri-həyat sığortası üzrə əməliyyatlarında artım müşahidə olunur.

Hesabata görə, icbari nəqliyyat vasitələrinin mülki məsuliyyət sığortası üzrə zərərlilik göstəricisi 2023-cü ildə 70%-dən 2024-cü ildə 74%-ə yüksəlib. 

Könüllü avtomobil sığortasında bu göstərici 47%-dən 55%-ə, ümumi sığorta bazarında isə zərərlilik göstəricisi 54%-dən 57%-ə yüksəlib.

Sığorta şirkətlərinin mənfəətində isə müəyyən azalma qeydə alınıb. Mərkəzi Bank bunu sektordan çıxan şirkətlərin fəaliyyətlərinin dayandırılması ilə izah edir. Mövcud şirkətlərin mənfəət göstəriciləri isə artım nümayiş etdirib.

Sektorun cəlb etdiyi kapital həcmi də artaraq 180 milyon manata çatıb. 2022-ci ilin sonunda bu göstərici 176 milyon manat səviyyəsində idi.

2024-cü ildə sığorta sahəsində əsas tənzimləmə tədbirlərindən biri Qlobal Korporativ İdarəetmə Standartlarının tətbiqi olub. Ehtiyatların hesablanması və yerləşdirilməsi ilə bağlı yeni qaydalar qüvvəyə minib. İlk dəfə olaraq, sığorta şirkətlərinin sistem əhəmiyyətinə dair qiymətləndirmələr aparılıb və ictimaiyyətə açıqlanıb.

N.Təbrizli