Avropa Rusiya qazından bir il tez imtina edə bilər

Avropa Parlamenti Avropa İttifaqının Rusiya qazından nəzərdə tutulandan bir il tez, yəni 2027-ci ilin yanvarından imtina etməsi ilə bağlı təklifləri nəzərdən keçirir.

"Report"un xəbərinə görə, bu barədə "Reuters" Avropa Komissiyasının təklifinə qanunvericilərin düzəlişlərini ehtiva edən sənədlərə istinadən xəbər verir.

Keçən ay Avropa Komissiyası parlamentə 2028-ci il yanvarın 1-dək Rusiya qazının bütün idxalını mərhələli şəkildə dayandırmaq təklifini təqdim edib. Bu təklif mərhələli şəkildə qazın çıxarılmasını sürətləndirmək üçün əlavə təşəbbüsün formalaşdırılması üçün hüquqi əsas təşkil edəcək. Yeni təklifə əsasən, Avropa İttifaqı 2026-cı ilin yanvarında yeni və qısamüddətli müqavilələri mərhələli şəkildə ləğv etməyə başlayacaq.

Avropalı diplomatlar deyir ki, hökumətlərin qadağanın bir il irəli çəkilməsini dəstəkləməsi çətindir. Bununla belə, qanunvericilər bu tələbdən digər dəyişikliklər üçün "rıçaq" kimi istifadə edə bilərlər. Məsələn, təşəbbüs müəllifləri qadağanı pozan şirkətlər üçün cərimələrin tətbiq edilməsini, o cümlədən onların enerji ticarəti lisenziyalarının ləğv edilməsini təklif edirlər