Ermənistanda rus hərbçisinin meyiti tapılıb

Ermənistanın Gümrü şəhərində bıçaq yaraları ilə bir kişinin meyiti tapılıb. Bu barədə yerli media xəbər verir.

Həlak olan şəxsin Rusiyanın 102-ci hərbi bazasında xidmət edən 24 yaşlı Rusiya vətəndaşı Antonenko olduğu müəyyən edilib.

102-ci Rusiya hərbi bazası Ermənistanın ikinci böyük şəhəri olan Gümrüdə yerləşir və 1990-cı illərin əvvəllərindən etibarən fəaliyyət göstərir.

Bu baza Moskva ilə Yerevan arasında təhlükəsizlik sahəsində strateji əməkdaşlığın əsas elementlərindən biri hesab olunur.

Son illərdə Gümrüdə yerləşən rus hərbçiləri ilə bağlı insidentlər cəmiyyətdə və mediada geniş rezonans doğurub.

2015-ci ildə bir rus hərbçisinin erməni ailəsini qətlə yetirməsi ölkədə ciddi etirazlara səbəb olmuşdu.

Hazırkı hadisə ilə bağlı hüquq-mühafizə orqanları araşdırma aparır.

N.Təbrizli