Ambaninin Reliance şirkəti Rusiyadan 33 milyard dollarlıq neft alıb

Asiyanın ən varlı iş adamı Mukeş Ambaniyə məxsus Hindistanın Reliance Industries şirkəti Rusiyadan təxminən 33 milyard dollarlıq neft alıb.  Bu barədə ə The Washington Post Hindistan hökumətinin məlumatına istinadən yazıb.

Enerji və Təmiz Hava Araşdırmaları Mərkəzinin (CREA) hesablamalarına görə, bu rəqəm Rusiyanın 410 milyard dollarlıq neft ixracının 8%-ni təşkil edir.

«Bu, təkcə bir şirkət üçün kifayət qədər böyük göstəricidir», – CREA analitiki Vaibhav Raqunandan bildirib.

Müharibədən əvvəl Hindistan demək olar ki, Rusiyadan neft almırdı, lakin Qərbin sanksiyalarından və hər barrel neftin qiymətinə qoyulan 60 dollarlıq məhdudiyyətdən sonra əməliyyatlar sərfəli olub. Hindistanın emal müəssisələri ucuz xammalı alaraq yanacağı bazar qiymətinə satıblar.

Kpler-in məlumatına görə, Reliance neftin yarısını Rusiyadan alıb.

Financial Times yazır ki, 2022-ci ildən Reliance ucuz Rus neftindən əlavə 6 milyard dollar qazanıb, bu isə Hindistan şirkətlərinin 16 milyard dollarlıq ümumi əlavə mənfəətinin 38%-nə bərabərdir.

Energy Aspects-in qiymətləndirməsinə görə, Hindistan orta hesabla barrelin qiymətinə 11 dollar endirim əldə edib.

Avqustda Donald Tramp Hindistana qarşı idxal rüsumlarını 50%-ə qaldıraraq Rusiyadan neft alışını dayandırmağı tələb edib, iyulda isə Aİ Rusiya neftindən istehsal olunan yanacaq idxalına embarqo qoyub.

N.Təbrizli