ABŞ Səudiyyə Ərəbistanındakı diplomatlarının ailə üzvlərinin bir hissəsini ölkədən çıxarır

ABŞ Dövlət Departamenti təhlükəsizlik təhdidləri ilə əlaqədar Səudiyyə Ərəbistanındakı diplomatlarının və səfirlik əməkdaşlarının ailə üzvlərinin bir hissəsinin ölkədən çıxarılması barədə qərar qəbul edib.Bu barədə Dövlət Departamentinin rəsmi saytında məlumat verilib.

Bildirilib ki, 2026-cı il oktyabrın 23-dən etibarən ABŞ hökumətinin kritik vəzifələrin icrasına cəlb olunmayan əməkdaşlarına, eləcə də onların ailə üzvlərinə təhlükəsizlik təhdidləri səbəbindən Səudiyyə Ərəbistanını tərk etmək göstərişi verilib.

Qeyd olunub ki, Yəmənin “Ənsar Allah” hərəkatının husiləri Səudiyyə Ərəbistanına qarşı hərbi əməliyyatlar aparır. Hücumlar mülki hava limanlarını və digər mühüm infrastrukturu da əhatə edir. Nəticədə mülki əhali arasında itkilər qeydə alınır, nəqliyyat əlaqələrində ciddi fasilələr yaranır.

Dövlət Departamenti münaqişənin birbaşa döyüş zonasından kənara sürətlə yayılması ehtimalının olduğunu da vurğulayıb.

Bundan əlavə, ABŞ diplomatlarına krallıq ərazisindəki istənilən hava limanından istifadə etmək üçün missiya rəhbərindən xüsusi icazə almaq tapşırılıb. Bu qərarın hava limanlarına raket və pilotsuz uçuş aparatları ilə son hücumlarla əlaqədar qəbul edildiyi bildirilib.

Dövlət Departamenti ABŞ vətəndaşlarına mümkün hücumlara, hava məkanının bağlanmasına, reyslərin ləğvinə və nəqliyyat əlaqələrində yarana biləcək fasilələrə hazır olmağı tövsiyə edib.

Qurum, həmçinin Səudiyyə Ərəbistanında raketdən müdafiə sistemlərinin, pilotsuz uçuş aparatlarının və onların düşdüyü ərazilərin foto və videolarının çəkilməsinin, eləcə də bu barədə məlumatların yayılmasının qadağan edildiyini xatırladıb. Bildirilib ki, bu qaydaları pozan, o cümlədən dövlət binalarını, hava limanlarını və raketlərin düşdüyü yerləri çəkən ABŞ vətəndaşları saxlanılb.