Günü gəlincə istər səndən əmanətini.
Şukranını sunarkən bir gün hörmətlə sana,
O sümüklər gedəcək! Gedəcək o Vətənə!
Bu gün təkcə
Azərbaycanın deyil, bütün türk dünyasının çoxəsrlik tarixinin ən böyük
simalarından biri olan M.Ə. Rəsulzadənin anadan olmasının 135 ili tamam olur.
Heç şübhəsiz ki, milli tariximizin zirvə nöqtəsi olan 1918-ci ilin 28 May – Azərbaycan
milli dövlətçiliyinin doğum günü birbaşa bu dahi şəxsiyyətin adı ilə bağlıdır.
M.Ə. Rəsulzadə
və digər Cümhuriyyət liderlərinin tarixi xidməti ondan ibarətdir ki, onlar
bütün müsəlman Şərqində ilk dəfə olaraq milli dövlətçiliyin Avropa modelini
gerçəkləşdirməyə cəhd göstərdilər. Məlumdur ki, Avropanın əksər xalqları
tarixi inkişafın həmin mərhələsini hələ XIX əsrdə keçmişdilər, Şərqdə isə bu
yolla ilk dəfə addımlamaq şərəfi M.Ə.Rəsulzadə və onun silahdaşlarına nəsib
oldu.
Bu anlamda Azərbaycan
Xalq Cümhuriyyətinin banisi - M.Ə. Rəsulzadə müasir Türkiyənin qurucusu olan
Atatürkü bir neçə il qabaqlamış oldu. Belə ki, Atatürkün XX əsrin 20-ci illərinin
ortalarında Türkiyə Cümhuriyyətini yaradarkən əldə rəhbər tutduğu milli dövlətçilik
ideyaları M.Ə. Rəsulzadə və silahdşları tərəfindən Azərbaycanda hələ
1918-1920-ci illərdə həyata keçirilmişdi. Həm də, Türkiyədə milli dövlət quruculuğu
gedişində əsasən avtoritar metodlara üstünlük verən Atatürkdən fərqli olaraq,
Azərbaycan liderləri demokratik dəyərlərə arxalanırdılar. Bu baxımdan, M.Ə. Rəsulzadə
və onun silahdaşlarını müəyyən mənada hətta Atatürkün müəllimi də hesab etmək
olar.
Doğrudur, Atatürkdən fərqli olaraq, Azərbaycan Cümhuriyyətinin
liderləri regiondakı əlverişsiz geosiyasi vəziyyət ucbatından həmin planlarını
və niyyətlərini tam şəkildə gerçəkləşdirə bilmədilər. Və İlk Azərbaycan
Cümhuriyyəti 1920-ci ilin aprelində rus-bolşevik işğalı nəticəsində süqut etdi.
Bundan sonra M.Ə. Rəsulzadə ölkənin hüdudlarını tərk etmək məcburiyyətində
qalsa da, mühacirət həyatının bütün çətinlik və məhrumiyyətlərinə rəğmən, qürbətdə
də Vətənin itirilmiş müstəqilliyinin bərpası uğrunda aramsız və fədakar mücadiləsini
davam etdirdi. Abdulla Taymasın söylədiyi kimi, M.Ə. Rəsulzadə həmin mücadiləyə
"hər şeyini, ailəsini, rahatlığını, sağlamlığını və nəhayət, həyatını fəda
etdi”.
Həyatı boyu
verdiyi saysız-hesabsız qurbanların "mükafat”ı isə doğma xalqının laqeydliyi və
biganəliyi oldu. Bu baxımdan, kiçicik "təsəllimiz” yalnız bu ola bilər ki, həyatlarını
Vətənin xoşbəxtlik və rifahı uğrunda mübarizəyə həsr etmiş Azərbaycan türklərinin
onsuz da azsaylı nümayəndələrinin - Mizə Cəlildən tutmuş Məhəmməd Hadiyə və Əli
bəy Hüseynzadədən Əhməd bəy Ağaoğlunadək istisnasız olaraq hamısı oxşar taleyi
yaşamışlar. Əks halda, Mirzə Cəlil ömrünün sonunda evini isitmək üçün sobada əlyazmalarını
yandırmalı olmazdı, yaxud Mirzə Ələkbər Sabirin "Hophopnamə"si ilk dəfə
şairin ölümündən sonra, həm də xeyli dərəcədə erməni ianələri hesabına işıq üzü
görməzdi.
Əks halda, 1947-ci
ildə yenidən Türkiyəyə dönən M.Ə. Rəsulzadə ömrünün sonuna kimi təmirsiz, siçovulların
qaçışdığı yarımzirzəmidə yaşamazdı. Türkiyədə yaşayan çoxsaylı imkanlı azərbaycanlılardan
və bu ölkənin hökumətindən heç kəs təkcə Azərbaycan deyil, bütün türk dünyası
qarşısında əvəzsiz xidmətləri olan M.Ə. Rəsulzadənin məişət şəraitini azca da
olsa yaxşılaşdırmaq üçün demək olar ki, heç nə etmədilər.
Çoxlarına xoş gəlməsə də, bu tarixi faktları nə gizlətmək, nə inkar
etmək, nə də zamanın ayağına yazmaq olmaz. Ən əsası isə, bütün bunlara görə məsuliyyəti
Azərbaycan ərazisində son yüz ildə mövcud olmuş ayrı-ayrı siyasi rejimlər və
onların rəhbərləri deyil, millət olaraq biz hamımız daşıyırıq. Hərçənd, biz
millətikmi? Millət zirvəsinə ucala bilmişikmi? Cavabı olmayan bu sualların
sayını sonsuzluğa qədər uzatmaq olar...
Sonucda
məşhur rus tarixçisi V. Klyuçevskinin bir kəlamını xatırlamaq istərdik. V.
Klyuçevski Rusiyanı nəzərdə tutaraq yazırdı: "Bu ölkə tək-tük dahilərdən və
milyonlarla heç nəyə yaramayan insanlardan ibarətdir”. Düşünürük ki, bu sözləri
tam əsasla Azərbaycan və azərbaycanlılara da aid etmək olar. Hər halda, yalnız
M.Ə. Rəsulzadə və beş-altı nəfər onun kimi dahi şəxsiyyətin sayəsində Azərbaycan
türkləri bu gün müstəqil dövlətə sahibidirlər.
Aydın Balayev
tarix elmləri doktoru
www.anews.az
Bizi sosial şəbəkələrdə izləyin !