Ukraynada atəşkəs elan olunsa da, ölkədə sabitlik yenidən pozula bilər.

Axar.az xəbər verir ki, Şərqi Ukraynada müstəqilliyini elan edən qondarma Luqansk Xalq Respublikasının lideri İqor Plotnitski Minsk protokolunu imzalamalarının müstəqillik iddialarından imtina mənasını vermədiyini bildirib.

Ukrayna ordusunun bölgədən çıxmasının tərəfdarı olduğunu deyən Plotnitski rus dilinin bölgənin rəsmi dili olacağını vurğulayıb.

Avropa Birliyinin (AB) Rusiyaya qarşı əlavə sanksiya qərarının tətbiq olunması və Kiyevin AB ilə iqtisadi əməkdaşlıq razılaşmasını təsdiqləməsi Kiyev-Moskva xəttində yeni qırılma nöqtələri ortaya çıxara bilər.

Bu arada Ukraynanın şərqində davam edən vətəndaş müharibəsini sona çatdırmaq üçün Minskdə imzalanan 12 maddəlik protokol açıqlanıb.

Ukrayna, Rusiya, ATƏT-in nümayəndələri və yerli bölgələrin-Luqansk və Donetsk nümayəndələri yol xəritəsini təyin ediblər. Qismən qarşıdurmalar baş versə də, ümumən atəşkəs tətbiq olunmağa başlayıb. Əsir mübadiləsi, ümumi əfv və humanitar yardımların çatdırılmasından sonra Kiyev rəhbərliyi qanuna dəyişiklik edərək Şərq Ukraynaya xüsusi status verəcək. Donetsk və Luqanskda erkən seçkilər keçirilərək yerli rəhbərliklər yaradılacaq. Bundan başqa ATƏT-in müşahidəçiləri Rusiya-Ukrayna sərhədinə nəzarət edəcək, Rusiya da separatçılara silah-sursat gömdərilməsini dayandıracq.

Protokolda yer alan ən əhəmiyyətli məqam isə qarşılıqlı olaraq məhbus və girovların sərbəst buraxılmasıdır. Mindən çox ukraynalı əsgərin separatçılarda, 200-dən çox separatçının isə Kiyevin əlində olduğu bildirilir. Bu gün səhər saatlarından başlayaraq əsirlərin təhvil verilməsi başlayıb.

Protokolda yer alan digər məqam isə tərəflərin hərbi güc vasitələrini geri çəkməsidir. Ukrayna ordunu şəhər mərkəzlərindən kənara çəkəndən sonra separatçılar da silah-sursatlarını təhvil verəcək.

ANN.Az