Azərbaycanda 2022-ci ildə Korrupsiya Qavrama İndeksində 100 mümkün baldan 23 bal alıb. Bu barədə Beynəlxalq Şəffaqlıq təşkilatının 2022-ci il korrupsiyaya dair hesabatında məlumat verilir.

Azərbaycan Korrupsiya Qavrama İndeksində son 10 ildəki ən aşağı balını- 100 mümkün bal üzərindən 23 bal alıb. Beləliklə, Azərbaycan 180 ölkə içərisində 157-ci yerdə qərarlaşıb.

Hesabata görə, Azərbaycan Honduras, İraq, Myanmar, Zimbabve ilə eyni pillədə yer alıb.

İqtisadçı ekspert Məhəmməd Talıblı bildirir ki, Beynəlxalq Şəffaflıq Təşkilatında siyahıda adı olan ölkələrdə islahatlar keçirilmədiyi halda hər il indekslər aşağı düşür.

" Azərbaycanda bu indeksin aşağı düşməsinin bir çox səbəbi var. Əsas səbəblərdən biri mülkiyyət hüququnun pozulması hallarının sıx-sıx yaşanması, inhisarçılıq meyllərinin güclü olmasıdır. Ona görə də, Azərbaycanın qavrayış indeksində hər il geriləyir. Bunun aradan qaldırılması üçün islahatların həyəta keçirilməsində siyasi iradənin güclü olması lazımdır. Davamlı, sistemli islahatlar, öncəliklə struktur islahatları, qeyri-neft sektorunun inkişafı, maliyyə islahatları aparılmalıdır”, - ekspert deyib.

Talıblı vurğulayır ki, ictimai iştirakçılıq da bu sahədə xüsusi rola sahibdir.

"Azərbaycanda 2004-cü ildən bəri vətəndaş cəmiyyəti sektoru tamamilə çökdürülüb. Bu məsələdə Vətəndaş Cəmiyyətinin etibarı olmalıdır ki, cəmiyyətdəki problemləri dilə gətirsin, bunlarla bağlı tədqiqatlar, monitorinqlər, araşdırma apara bilsin, qüsurları hökumətin diqqətinə çatdırsın. Yalnız bu addımlardan sonra korrupsiya səviyyəsini aşağə salmaq haqqında düşünə bilərik”, - iqtisadçı ekspert bildirib.

Deputat Razi Nurullayev bildirir ki, Azərbaycanın şəffaqlıq məsələsində bu qədər geriləməsi təəssüf doğurur.

"Lakin hesab edirəm ki, Azərbaycan ötən ildə korrupsiyanın qarşısının alınması istiqamətində ciddi addımlar atıb və bu illər ərzində ölkədə şəffaflıq bir çox dövlət qurumlarında əvvəlkindən çox yaxşı vəziyyətdədir”, - deputat bildirib.

Razi Nurullayev hesab edir ki, Azərbaycanın bu sahədə geriyə getməsinin mühüm səbəblərindən biri ölkədə ictimai iştirakçılığın zəif olmasıdır.

"Müxtəlif dövlət təşkilatlarının nəzdində ictimai şuralar yaradılır ki, onlar həmin qurumlara nəzarət edib onlarla hesablaşsınlar. Şəffaflığın zəif olmasına səbəb həmin təşkilatların müstəqil olmamalarıdır. Belə təşkilatları bəzi hallarda dövlət qurumları özləri seçir və onlar üzərində hegemonluq edirlər. yaxud da, həmin təşkilatın üzvləri bu və ya digər şəkildə ələ alınır, qurumların mənfi tərəflərinə göz yumurlar. Nəticədə də, şəffaqlıq zəifləyir”, - deputat vurğulayıb.

Hesabata görə, qonşu ölkələrdən Türkiyə 101-ci, Rusiya 137-ci, Gürcüstan 41-ci, İran 147-ci, Ermənistan 63-cü pillədə qərarlaşıb.