Azərbaycanlı tələbə kikboksun WTK versiyası üzrə dünya çempionu olub. ANS PRESS-in məlumatına görə, İtaliyanın Marina-de Karra şəhərində keçirilən kikboksun WTK versiyası üzrə vahid dünya çempionatında "Dünya çempionu - 2014" titulunu qazanıb. Ukraynanın yığma komandasının tərkibində çıxış edən Eltac Əliyev O. Qonçar adına Dnepropetrovski Milli Universitetinin tələbəsidir. Həmyerlimiz sözügedən dünya çempionatında 74 kq çəkili kikboksçularla meydançaya çıxıb. Azərbaycanlı tələbə keçirdiyi 5 döyüşün hər birini qələbə ilə başa vurub. Həmyerlimiz 1/4 finalda ingilis və fransız, yarımfinalda isə iki təcrübəli italiyalı kikboksçunu məğlub edərək finala vəsiqə qazanıb. Eltac finalın "loykik" bölməsində Ukraynadan olan idmançı ilə yarışıb və qalib olub. Nəticədə azərbaycanlı tələbə ən yüksək pilləni, birinci yeri qazanıb. Eltac Əliyev boks üzrə idman ustasıdır, beşqat Ukrayna çempionudur. Dnepropetrovskidə təhsil alan həkmyerlimiz həmçinin vilayət yarışlarında qazandığı qələbələrdə çoxsaylı mükafat və medallar alıb. Azərbaycan Gəncləri Ukrayna Təşkilatının sədri Elza Bəkirova ANS PRESS-ə açıqlamasında, həmyerlimizin qələbəsindən böyük fəxr hissi keçirdiklərini bildirdi: "Bu Eltac üçün dünya səviyyəsində ilk yarış idi və o, bu yarışdan 2014-cü ilin dünya çempionu titulu ilə geri döndü. Həmyerlimizi təbrik edirik və bundan sonra da uğurlar, yeni qələbələr arzulayırıq! Azərbaycan gəncləri Ukrayna təşkilatının sədri kimi məhz həmyerlimizin kikboks üzrə 2014-cü ilin dünya çempionu olması ilə fəxr edirəm. Biz azərbaycanlılar üçün bu böyük sevincdir. Mən öz vətənini ölkədən kənarda layiqinncə təmsil edən hər bir azərbaycanlının uğuru ilə fəxr edirəm!" ANN.Az