Bakı kəndlərindən şəhər istiqamətinə gələn marşrutların bir neçəsi bağlanıb

Bakıda marşrutların qrafikində dəyişiklik edilib.

Məlumatlı mənbədən Gün.Az-a verilən məlumata görə, bu gündən etibarən Bakıətrafı qəsəbə və kəndlərdən şəhər istiqamətinə gələn bəzi marşrutların yolu qısaldılıb, bəzilərinin hərəkət istiqaməti dəyişdirilib, bəziləri isə ümumiyyətlə ləğv edilib.

Belə ki, 60, 80 və 131 saylı marşrut xətti üzrə hərəkət edən avtobusların yolu qısaldılaraq son dayanacaq kimi metronun “Koroğlu” stansiyasının ətrafı təyin edilib.

Bundan başqa 54 və 42 nömrəli xətt marşrutlarının yolu da qısaldılaraq “Laçın Ticarət Mərkəzi”nə qədər məhdudlaşdırılıb.

87 nömrəli marşrut avtobusları isə ümumiyyətlə xətdən çıxarılıb.

Mənbənin sözlərinə görə, bu addım sınaq məqsədilə atılıb. Məqsəd isə böyük avtobusların şəhərə daxil olaraq nəqliyyatı iflic vəziyyətə salmasının qarşısını almaqdır.

Amma, bu hələ sınaq müddəti olduğuna görə rəsmi verilmiş bir qərar deyil. Təxminən 1 ay davam edəcək sınaq müddəti uğurlu keçərsə bu qərar qüvvədə qalacaq və qrafik bu formada olacaq.

Məsələ ilə bağlı Nəqliyyat Nazirliyinin mətbuat katibi Namiq Həsənovla əlaqə saxlasaq da, o, heç bir şərh vermədi.

ANN.Az