"Nifrət Nitqinə Yox Hərəkatı" kampaniyası çərçivəsində aksiya

Aksiyanın əsas məqsədi insanları nifrət cinayətləri və onun qurbanları, ümumilikdə "Nifrət nitqinə yox hərəkatı" kampaniyası haqqında məlumatlandırmaqdır.

Aksiya çərçivəsində 2 gənc karikaturist aksiyaya maraq göstərən gənclərin karikaturalarını çəkib. Karikturistlərdən biri gəncləri pozitiv halda, digəri qəzəbli halda çəkərək onları nifrət nitqinin aktoru kimi təsvir edib. Hər iki nəticə ətrafdakı insanlara göstərilərkən onların reaksiyası maraq doğurub. Aksiya zamanı təşkilatçılar tərəfindən insanlar nifrət nitqi və nifrət cinayətləri haqqında maarifləndirilib eləcə də onlara "Nifrət Nitqinə Yox Hərəkatı" kampaniyası barədə ətraflı məlumat verilib.

Qeyd edək ki, "Nifrət Nitqinə Yox Hərəkatı” Kampaniyası Avropa Şurası tərəfindən həyata keçirilir və onun üzvü olan ölkələrdə təşkil olunan kampaniyalara əsaslanır. Kampaniya 2012-2014-cü illər üzrə həyata keçirilən "Gənclərin nifrət nitqinə qarşı onlayn mübarizəsi” layihəsinin bir hissəsidir. Azərbaycan Respublikası Gənclər Təşkilatları Milli Şurası "Nifrət Nitqinə Yox Hərəkatı” Kampaniyasının Azərbaycan üzrə əlaqələndiricisidir. Gənclər Təşkilatları Milli Şurası 2013-cü ilin aprel ayından etibarən Avropa Şurasının "No Hate Speech Movement” - "Nifrət Nitqinə Yox Hərəkatı”na qoşulub və bu çərçivədə bir sıra fəaliyyətlər həyata keçirib.

Məlumat üçün qeyd edək ki, ölkənin ən böyük gənclər platforması olan Azərbaycan Respublikası Gənclər Təşkilatları Milli Şurası 1995-ci ildən fəaliyyət göstərir. Təşkilatın məqsədi gənclərin bilik və bacarıqlarının Azərbaycan dövlət müstəqilliyinin möhkəmlənməsinə, beynəlxalq aləmdə layiqli yer tutmasına, demokratik quruculuq işlərinə yönəltməkdir. 1997-ci ildən Avropa Gənclər Forumu, Türk Dünyası Gənclər Birliyinin tam hüquqlu üzvü, 2002-ci ildən BMT-nin İqtisadi və Sosial Şurasının məşvərətçi statuslu üzvü, İslam Konfransı Forumunun təsisçisi və tam hüquqlu üzvü, Dünya Azərbaycanlı Gənclər Birliyi, "Böyük İpək Yolu” beynəlxalq gənclər təşkilatının təsisçisi, 2014-cü ilin dekabr ayında keçirilən seçkilərdə Avropa, Asiya, Avstraliya, Afrika və Amerika qitələrindən 120 gənclər platformasını birləşdirən Dünya Gənclər Assambleyasının tamhüquqlu üzvüdür.