Azərbaycan Gənc Müəllimlər Assosiasiyasının I Forumu keçirilib

Bu gün Azərbaycan Gənc Müəllimlər Assosiasiyasının I Forumu keçirilib.

APA-nın məlumatına görə, 2 fevral – Azərbaycan Gəncləri Günü münasibətilə keçirilən forumun əsas məqsədi gənc müəllimlərin ümumrespublika səviyyəsində toplantısı vasitəsilə onların gələcək fəaliyyət istiqamətlərini müəyyənləşdirmək və əməkdaşlıq şəbəkəsini genişləndirməkdir.

Forumda Azərbaycan Respublikası Prezident Administrasiyasının Gənclər siyasəti və idman məsələləri şöbəsinin müdiri Yusuf Məmmədəliyev, Təhsil naziri Ceyhun Bayramov, nazirlik yanında İctimai Şuranın üzvləri, Gənclər və İdman Nazirliyi, eləcə də Gənclər Fondunun əməkdaşları, pedaqoji ixtisaslı ali təhsil müəssisələrinin rektorları, gənc müəllimlər iştirak ediblər.

Forumda Azərbaycan Gənc Müəllimlər Assosiasiyasının fəaliyyətinə dair videoçarx nümayiş olunub.
Təhsil naziri Ceyhun Bayramov forumda çıxış edərək ölkəmizdə müəllim peşəsinin nüfuzunun artırılması istiqamətində görülən işlərdən danışıb: "Forum əlamətdar tarix ərəfəsində keçirilir. Sabah Heydər Əliyev tərəfindən təsis olunan Gənclər Günü qeyd olunur. Cəmiyyətin inkişafında, insanın şəxsiyyət kimi formalaşmasında, təhsilin inkişafında müəllimin əvəzsiz əməyi var. Azərbaycan dövləti müəllimlərə diqqət və qayğı ilə yanaşır. Müəllim savad, bilik verməklə yanaşı, gənc nəslə milli mənəvi dəyərlər, onların vətənpərvər ruhda böyüməsində öz həyatlarını həsr edirlər. Həyatda uğur qazanmış hər kəs valideyni qədər müəlliminə minnətdar olmalıdır".

Nazir qeyd edib ki, uzun illər ərzində peşəkar kadr ehtiyacı olan ən ucqar məntəqələrdə demək olar ki, müəllim problemi həll olunub: "Həmin ərazilərdə vakant yerlər 100 faiz dolub. 2019-cu ildə 500-dən yuxarı bal toplayan hər 4 nəfərdən biri müəllim ixtisasını seçib".
Tədbir bədii hissə ilə davam etdirilib.

www.anews.az