Şəkidə peyda olan ayının taleyi necə oldu? - AÇIQLAMA

İki gün əvvəl Şəkidə peyda olan ayı bir anda gündəmə çevrilib. Hazırda hadisə ilə bağlı insanları ən çox maraqlandıran məqam ayının boğazında xaltanın olub-olmamasıdır.

Çünki ötən gün Ümumdünya Vəhşi Təbiəti Mühafizə Fondunun Azərbaycan nümayəndəliyinin rəhbəri Elşad Əsgərov açıqlamasında xaltanın ola biləcəyini diqqətə çatdırıb. Lakin həmin vaxt araşdırma yekunlaşmadığı üçün tam olaraq belə bu fikrin üstündə dayanmaq mümkün olmadı. Maraqlıdır, araşdırmanın yekun nəticəsi nə olub?

Məsələ ilə bağlı Yenisabah.az-a açıqlama verən Elşad Əsgərov qeyd edib ki, ayının boynundakı iz kəndir izidir: "Ayı ilə bağlı görmədiyim bəzi kadrları da gördüm. Onun boynuna Bakı Zooparkından adamlar getmədən əvvəl maşına mindirmək üçün kəndir salmağa çalışıblar. Daha sonra zooparkdan gələnlər qalın örkənlə maşının içinə yönəldirlər. Amma birinci dəfə boğazına kəndir salınması pis haldır, çünki iz ondan qalıb. Yəni xalta deyil. Ayının haradasa yaşaması ilə bağlı da fakt çıxmadı. Baytarlar ayıya baxdılar, meşədən gəlib, əl heyvanı deyil. Hətta onun meşədə başqa bir ayı ilə savaşı olub. 5-6 yaşı var. Bu yaşda olan ayılar ərazi, yem və s. üçün dalaşırlar. Ayının alnında çoxlu yaralar, başqa ayının dırnaq izləri vardı. Onu canavar elə edə bilməzdi.”.

Elşad Əsgərov ayının görmə qabiliyyətini itirdiyini də vurğulayıb: "Yaralarda infeksiya olub, nəticədə gözləri tutulub. Onu təmizlədilər, amma görmə qabiliyyətinin bərpası yəqin ki, mümkün olmayacaq. İnfeksiya dərinə gedib, çox güman ki, sinir sisteminə də toxunub. Davranışı ona görə fərqli idi. Bərpa mərkəzində nə vaxta qədər qalacağı isə hələlik bəlli deyil. Çünki müalicə təzə başlayıb və davam edir. Onun yaralarını təmizləyiblər, məhlul tökülüb, müalicənin nə vaxt sonlanacağını baytarlar bilir”.

www.anews.az