İmişlidə bayraq qalmaqalı böyüyür - İcra hakimiyyəti araşdırırmı?/Video

 İmişli rayonunda 9 May Qələbə Günü münasibətilə keçirilən tədbirdə Azərbaycan bayrağı ilə yanaşı, keçmiş Sovet Sosialist Respublikaları İttifaqının (SSRİ) bayrağı da divara sancılıb. Hadisə rayon Ağsaqqallar Şurası tərəfindən təşkil olunan tədbirdə baş verib.

Bayrağın divara sancıldığını əks etdirən video və fotoşəkillər Şuranın sosial şəbəkə hesablarında yayılıb və ictimai qınağa səbəb olub.

İmişli Rayon İcra Hakimiyyəti başçısının birinci müavini Mirzə Quliyev Anews.az-a bildirib ki, məsələ ilə bağlı hazırda araşdırma aparılır.

Tədbirin təşkilatçısı, İmişli Ağsaqqallar Şurasının sədri Saleh Səmədov baş verənləri təsdiqləyərək bildirib ki, bununla bağlı icra hakimiyyətindən ona heç bir xəbərdarlıq olunmayıb.

O, SSRİ bayrağının asılmasını belə izah edib:

"Bu müharibənin simvoludur. Orada atalarımız,babalarımız döyüşüb. Buna görə də o bayrağı asmışıq. Biz SSRİ dövründə yaşamışıq və bununla bağlı bir keçmişimiz var", - o bildirib. 

SSRİ-yə aid bayrağı haradan əldə etmisiz sualına cavabında  isə Səmədov bildirib ki, Azərbaycanda SSRİ bayrağını istənilən yerdən almaq olar. 

O həmçinin SSRİ bayrağını sancmalarını o dövrün nostaljisindən irəli gəldiyini də vurğulayıb. 

Ağsaqqallar Şurası sonradan yaydığı açıqlamada tədbirdə bir sıra şəxslərin — o cümlədən Azərbaycan Rus İcmasının birinci müavini Dmitri Yakovlevin, Rus Mədəniyyət Mərkəzinin direktoru Qalina Yakovlevnanın və digər yerli nümayəndələrin çıxış etdiyini bildirib. Onlar çıxışlarında faşizm üzərində qələbəni xatırladaraq, iştirakçıları 80 illik yubiley münasibətilə təbrik ediblər.

Bu il Prezident İlham Əliyev Moskvada keçirilən ənənəvi Qələbə Paradında iştirak etməyib. Yerli mediada bu qərar Rusiya tərəfindən Azərbaycan təyyarəsinin vurulması və cəzasız qalan günahkarlar, Rusiya tərəfindən Azərbaycan mediasına qarşı kiberhücumlar və millət vəkili Azər Badamovun Rusiyadan deportasiyası ilə əlaqələndirilib.

Azərbaycanın Qələbə Paradında iştirakını isə yalnız 80 nəfərlik hərbi heyət təmin edib — bu da Azərbaycanın müstəqillik və suverenliyə verdiyi önəmin bir simvolu kimi qiymətləndirilir.

Gülnar Nazimqızı 

o