Son altı ayda havada toz dumanında artım nə qədər olub?

2025-ci ilin ilk yarısında Azərbaycanda atmosfer havasındakı dispers toz hissəciklərinin konsentrasiyası ötən ilin eyni dövrü ilə müqayisədə nisbətən azalıb. Bu barədə Ətraf Mühitin Çirklənməsinin Monitorinq Qrupunun baş mühəndisi Rəna Allahverdiyeva anews.az-ın sorğusuna cavab olaraq bildirib. 

Onun sözlərinə görə, hava keyfiyyətinə nəzarət Bakı, Sumqayıt və Gəncə şəhərlərində fəaliyyət göstərən avtomatik monitorinq stansiyaları, mobil laboratoriyalar və portativ cihazlar vasitəsilə aparılır.

“2024-cü ilin yanvar-iyun aylarında dispers tozun orta aylıq konsentrasiyası norma daxilində olsa da, bəzi günlərdə göstəricilər normanı 1.1–3.1 dəfə keçib. 2025-ci ilin eyni dövründə isə bu rəqəmlər 1.1–2.4 dəfə arasında dəyişib,” – Allahverdiyeva bildirib.

Mühəndis qeyd edib ki, ölkədə havanın tozla çirklənməsi əsasən transsərhəd xarakter daşıyır.

Toz hissəcikləri əsasən Xəzər dənizi üzərindən gələn şərq və cənub-şərq küləkləri vasitəsilə əraziyə daxil olur.

Eyni zamanda, şimal və şimal-qərb küləkləri ilə yerin üst səthindəki tozun ətraf ərazilərə yayılması da bu hallara səbəb olur.

Gülnar Nazimqızı