Müğənni Rəksanənin həyat yoldaşı Rusiyadan kömək istəyib

Həbsdə olan müğənni Rəqsanə İsmayılovanın həyat yoldaşı, azərbaycan əsilli rusiyalı iş adamı Fazil Amiraslanov Rusiya səfirliyinə müraciət edərək ailəsinin təhlükəsizliyinin təmin olunmasını və Rusiyaya qaytarılmasını xahiş edib.

“Mən, Fazil Amiraslanov, Rusiya vətəndaşı olaraq, səfirlikdən mənim və uşaqlarımın təhlükəsizliyini təmin etməyi və bizi ölkəmə qaytarmağı xahiş edirəm”, – o, Instagram səhifəsində yazıb.

Rəksanə İsmayılova iki gün əvvəl 1 milyon manatdan çox (təxminən 600 min dollar) dəyərində dələduzluqda ittiham olunaraq həbs edilib.

Onun vəkili Hikmət Əliyev müğənninin azyaşlı iki uşağının olduğunu və ictimaiyyət üçün təhlükə yaratmadığını əsas gətirərək, həbs qətimkan tədbirinin dəyişdirilməsi üçün apellyasiya şikayəti verib. Şikayət iki gün ərzində Bakı Apellyasiya Məhkəməsində baxılacaq.

N.Təbrizli