Azərbaycanda bank kartlarına kiber hücumlar yenidən artıb

Bank kartlarından kiber oğurluq hallarında ötən dövrlərlə müqayisədə ümumi azalma müşahidə olunsa da, son günlərdə saxta zəng və mesajlar vasitəsilə kart sahiblərinin aldadılması hallarının yenidən artdığı bildirilib. Bu barədə Daxili İşlər Nazirliyi (DİN) məlumat yayıb.

Nazirliyin məlumatına əsasən, xarici nömrələrdən bank əməkdaşı kimi təqdim olunan şəxslər vətəndaşlara zəng edərək və ya mesaj göndərərək bank kartı məlumatlarını əldə etməyə çalışırlar.

"Bu cür zəng və yazışmalar saxtadır. Heç bir bank SMS və ya zəng vasitəsilə PIN kod, CVV, təsdiq şifrəsi və ya digər kart məlumatlarını tələb etmir", –  DİN-in açıqlamasında qeyd olunub.