Əliyev Türkiyədə zəlzələnin 3-cü ildönümü ilə bağlı Ərdoğana məktub göndərib

Azərbaycan Prezidenti İlham Əliyev Türkiyədə baş vermiş dağıdıcı zəlzələnin üçüncü ildönümü münasibətilə Türkiyə Prezidenti Rəcəb Tayyib Ərdoğana məktub ünvanlayıb. 

Məktubda İlham Əliyev zəlzələ nəticəsində həlak olmuş insanların xatirəsini ehtiramla yad edib, faciəni Türkiyə üçün ciddi humanitar sınaq kimi qiymətləndirib. Azərbaycan Prezidentinin sözlərinə görə, baş verən hadisələr Azərbaycan xalqı tərəfindən dərin ağrı ilə qarşılanıb və qardaş Türkiyənin kədəri öz kədəri kimi qəbul olunub.

Əliyev qeyd edib ki, faciənin ilk anlarından etibarən Azərbaycan dövləti və cəmiyyəti Türkiyənin yanında olub, birlik və həmrəylik nümayiş etdirib. Məktubda Türkiyənin zəlzələnin nəticələrinin aradan qaldırılması istiqamətində Ərdoğanın rəhbərliyi altında mühüm nailiyyətlər əldə etdiyi vurğulanıb.

Azərbaycan Prezidentinin bildirdiyinə görə, Azərbaycan Kahramanmaraş vilayətində aparılan yenidənqurma və bərpa işlərinə töhfə verib və burada “Azərbaycan” məhəlləsinin salınmasında yaxından iştirak edib.

Məktubda Azərbaycan–Türkiyə münasibətlərinin “Bir millət, iki dövlət” prinsipi əsasında bundan sonra da regional sabitlik, təhlükəsizlik və davamlı inkişafa xidmət edəcəyi ifadə olunub.

İlham Əliyev sonda Ərdoğana, həlak olanların ailələrinə və bütün Türkiyə xalqına bir daha başsağlığı verib, həyatını itirənlərə Allahdan rəhmət diləyib.