Bill Geyts Ceffri Epşteynlə əlaqələrini “böyük səhv” adlandırıb

Bill Geyts ABŞ Ədliyyə Nazirliyinin (DOJ) sənədlərinin açıqlanmasından sonra mərhum maliyyəçi Ceffri Epşteyn ilə əlaqələri barədə peşmanlığını açıqlayıb.

"The Wall Street Journal" qəzetinin məlumatına görə, Geyts qapalı görüşdə bildirib ki, Epşteynlə vaxt keçirmək və fondun liderlərini bu görüşlərə cəlb etmək “böyük səhv” olub. O bununla bağlı etiraf edib:

"Etdiyim bir səhvə görə bütün bunlarda iştirak edən insanlardan üzr istəyirəm", - o bildirib. 

Ədliyyə Nazirliyinin sənədlərində Geytsin bir neçə qadınla çəkilmiş şəkilləri də yer alıb. Geyts işçilərinə açıqlayıb ki, şəkillər görüşlərdən sonra Epşteynin xahişi ilə çəkilib və vurğulayıb ki, o, “heç vaxt qurbanlarla və ya ətrafındakı qadınlarla vaxt keçirməyib”.

Bundan əlavə, Geyts “Wall Street Journal”a bildirmişdir ki, o, rusiyalı qadınlarla iki münasibət yaşayıb, lakin heç birində Epşteynin qurbanları iştirak etməyib. Geyts həmçinin işçilərinə deyib:

"Mən qanunsuz heç nə etməmişəm. Qanunsuz heç nə görmədim", - o əlavə edib. 

Bu açıqlama Geytsin Epşteynlə əlaqələrinə dair ictimaiyyətə ünvanladığı ilk geniş etiraf kimi qiymətləndirilir.

Gülnar Nazimqızı