Şarl Mişel: Aİ ciddi təhdidlərlə üz-üzədir

Avropa İttifaqı hazırda ciddi təhdidlərlə üzləşir. XIII Qlobal Bakı Forumunda çıxış edən Şarl Mişelin sözlərinə görə, Aİ layihəsi üç əsas vəd — sülh, rifah və demokratik prinsiplər — üzərində qurulub. 

Lakin indi bu prinsiplərin hər biri müxtəlif təzyiqlərlə sınağa çəkilir.

“Ukraynaya qarşı müharibə, Yaxın Şərqdəki münaqişə, Avropada rəqabət qabiliyyəti, iqtisadi artım, investisiya və tənzimləmə ilə bağlı problemlər bu təzyiqlərin əsas hissəsidir. Eyni zamanda demokratiya, insan ləyaqəti və beynəlxalq hüquq prinsipləri də hər gün sınaq qarşısındadır”, —  o bildirib.

Onun sözlərinə görə, beynəlxalq münasibətlərdə ikili standartların artması beynəlxalq hüquq və qlobal sistem üçün ciddi təhlükə yaradır. Bu səbəbdən Avropa İttifaqı daha müstəqil və strateji qərarlar qəbul etməlidir.

Mişel qeyd edib ki, ABŞ ilə Avropa İttifaqı arasında ənənəvi ittifaq da dəyişir və tərəflər arasında iqlim siyasəti, beynəlxalq hüquq və Yaxın Şərq məsələləri üzrə fərqlər getdikcə dərinləşir.

O vurğulayıb ki, bu şəraitdə Aİ üç əsas istiqamətdə addım atmalıdır: iqtisadi rəqabət qabiliyyətini artırmaq və daha ağıllı tənzimləməyə keçmək, təhlükəsizlik və müdafiə sahəsində Avropanın imkanlarını gücləndirmək, həmçinin etibarlı tərəfdaşlıqlar qurmaq və təchizat zəncirlərini şaxələndirmək.

“Rusiya fosil yanacaqlarından, Çin istehsal zəncirlərindən və ABŞ-ın təhlükəsizlik təminatlarından həddindən artıq asılı olduğumuz dövr artıq başa çatıb”, —  Mişel bildirib.

 Gülnar Nazimqızı