WUF13-ün təşkili ilə əlaqədar yaradılmış Təşkilat Komitəsinin iclası keçirilib

Birləşmiş Millətlər Təşkilatının Ümumdünya Şəhərsalma Forumunun On Üçüncü Sessiyasının (WUF13) təşkili ilə əlaqədar yaradılmış Təşkilat Komitəsinin mayın 7-də iclası keçirilib.

Azərbaycan Prezident Administrasiyasının rəhbəri və Təşkilat Komitəsinin sədri Samir Nuriyev iclası açaraq bildirib ki, mayın 17-22-də Bakıda keçiriləcək WUF13 şəhərsalma və dayanıqlı inkişaf sahəsində əsas beynəlxalq platformalardan biri olacaq. Onun sözlərinə görə, tədbir Azərbaycanın şəhərsalma sahəsində yanaşmalarının və işğaldan azad edilmiş ərazilərdə həyata keçirilən bərpa layihələrinin beynəlxalq təqdimatı baxımından əhəmiyyət daşıyır.

Nuriyev qeyd edib ki, forumda iştirak üçün indiyədək 177 ölkədən 28 mindən çox şəxs qeydiyyatdan keçib və iştirakçıların təxminən yarısını xarici nümayəndələr təşkil edir. 

İclasda Azərbaycanın təşəbbüsü ilə WUF tarixində ilk dəfə keçiriləcək Liderlərin Bəyanatları seqmentinin forumun əsas yeniliklərindən biri olduğu vurğulanıb. Bildirilib ki, bu format şəhərsalma və dayanıqlı məskunlaşma məsələlərinin yüksək səviyyədə müzakirəsinə imkan yaradacaq.

Tədbirdə həmçinin Azərbaycanın sədrliyi ilə keçiriləcək Nazirlər Görüşünə, xüsusi sessiyalara, Azərbaycan pavilyonunda təşkil olunacaq tədbirlərə və azad edilmiş ərazilərdə aparılan yenidənqurma işlərinin təqdimatına hazırlıq məsələləri müzakirə edilib.

Təşkilat Komitəsinin üzvləri substantiv hazırlıq, kommunikasiya, protokol, nəqliyyat və logistika istiqamətlərində görülən işlər barədə hesabat təqdim ediblər. İclasın yekununda Samir Nuriyev aidiyyəti qurumlara hazırlıq prosesinin son mərhələsində işlərin daha intensiv və koordinasiyalı şəkildə davam etdirilməsi barədə tapşırıqlar verib.